Како што се менува нашата перцепција за „здрав начин на живот“ и „убавина“, така расте и интересот на секој поединец за користење на различни козметички производи. Козметичката индустрија е една од најбрзо растечките глобални индустрии, која претставува мулти-милијардерска моќ, која постојано се развива преку иновации во козметичките супстанции и производи.
Клучни податоци за козметичката индустрија:
До краот на 2025 година, се очекува козметичката индустрија да достигне приходи од 650 милијарди долари.
Производите за нега на кожата го водат пазарот, сочинувајќи 40% од вкупните приходи.
Природните и органските козметички производи растат со стапка од 10% годишно.
Е-трговијата сега сочинува повеќе од 35% од глобалните продажби на козметички производи.
Пазарот на машка козметика (вклучувајќи нега на кожа, парфеми, шампони, производи за бриење и декоративна козметика) е предвидено да расте со годишна стапка од 6,2% од 2023 до 2030 година и се очекува да достигне 75 милијарди долари до крајот на 2025 година, што ја прави една од најбрзо растечките категории на козметичкиот пазар.
70% од купувањата на козметички производи се под влијание на социјалните медиуми и маркетингот на инфлуенсери.
Миленијалците и Генерацијата Z сочинуваат 60% од глобалната база на потрошувачи на козметички производи.
Овие податоци ја нагласуваат брзината на растот на индустријата и иновациите кои ја обликуваат иднината на козметиката. Со промената на потрошувачките навики и технологиите, козметичката индустрија продолжува да се адаптира и да расте.
Безбедност на козметичките производи
Важно е да се знае што всушност содржат козметичките производи што ги користиме.
Дневната експозиција на просечна индивидуа од употребата на различни козметички производи е 17,79 грама, од кои дел се одмиваат, а дел остануваат на кожата или аднексите на кожата (коса, нокти). Поради оваа постојана употреба, безбедноста на производите е од клучна важност за заштита на здравјето на потрошувачите.
Во ЕУ (Регулатива 1223/2009), како и во РС Македонија, козметичките производи се регулирани со законодавство што ја гарантира нивната безбедност. Законот за безбедност на козметички производи (Сл. Весник бр. 55/2007) ги уредува условите за безбедност, тестирање на производите и нивниот надзор, додека производството е регулирано со Правилникот за добра производна пракса за козметички производи (Сл. Весник бр. 156/2007), кој поставува стандарди скоро идентични на оние за производството на лекови.
За разлика од лековите, одговорноста за квалитетот и безбедноста на козметичките производи е исклучиво на производителот што го пласира производот на пазарот или на правното лице кое го врши прометот со производот. Затоа, важно е да се проверува репутацијата на производителот и да се избираат производи од доверливи извори!
Рекламирање на козметички производи
Рекламирањето на козметички производи треба да биде искрено, транспарентно и етички одговорно.
Производителите не смеат да даваат здравствени тврдења за своите производи, бидејќи козметичките производи не лекуваат болести.
ШТО ТРЕБА ДА ЗНАЕМЕ ЗА РЕКЛАМИРАЊЕТО НА КОЗМЕТИЧКИТЕ ПРОИЗВОДИ?
Согласно дефиницијата, козметичките производи се исклучиво наменети за нега, заштита, чистење, парфиирање и разубавување на кожата и аднексите на кожата, па оттука истите не лекуваат. Тие на пример, може да ја хидрираат кожата и да имаат емолиентен ефект, но не е дозволено тврдењето дека се наменети за ефикасен третман против брчки; Може да се наменети за чистење на масна кожа, но не и дека лекуваат акни и сл.
ВНИМАВАЈТЕ И ПРИ ИЗБОРОТ НА Т.Н. „МЕДИЦИНСКА КОЗМЕТИКА“.
Овој поим не е препознаен од регулаторните тела на ЕУ, ниту во РС Македонија.
Или производот е козметички препарат (согласно погоре наведената дефиниција) или треба да биде регистриран како медицински/граничен производ.
Оттука, БРЕНДОВИТЕ ШТО СЕ ПРОДАВААТ ИСКЛУЧИВО ВО АПТЕКА Е ЖЕЛБА НА ПРОИЗВОДИТЕЛОТ СО ЦЕЛ ДА ДАДЕ ДОПОЛИТЕЛНА ВРЕДНОСТ НА СВОИТЕ ПРОИЗВОДИ, НО ВО ОСНОВА, ПОДЛЕЖИ НА РЕГУЛАТИВАТА КАКО И ЗА СЕКОЈ ДРУГ КОЗМЕТИЧКИ ПРОИЗВОД.
Термините како „тестиран на безбедност“, „без штетни хемикалии“, „не е тестиран на животни“ се дел од нефер рекламирањето, со оглед дека тоа е законски обврзувачко за сите козметички производи.
Што треба да знаеме за состојките на козметичките производи?
Клучно е да знаеме што всушност има во производите што ги користиме.
Затоа, ПРОВЕРЕТЕ ШТО СОДРЖИ ВАШИОТ ИЗБРАН КОЗМЕТИЧКИ ПРОИЗВОД!
Секогаш погледнете ја „Листата на состојки“. Листата на состојки се наведува по редослед на концентрација, почнувајќи од онаа што има најголемо присуство во производот. И тогаш може да забележите дали состојката „на која и се припишува ефектот на производот“ е погоре или при крај на листата, па оттука и дали навистина треба да очекуваме одредени бенефити од тој производ.
Доколку сакате да ги проверите состојките во козметичкиот производ и дали истите се дозволени за употреба, истото може да го направите преку Cosing базата на Европската комисија.
Несакани реакции од употребата на козметички производи
Во овој дел, потрошувачите не се доволно информирани. Пријавувањето на несаканите реакции помага во создавање на пазар на кој козметичките производи се подложни на строги безбедносни проверки и потрошувачка заштита. Доколку по употребата на одреден козметички производ се појават несакани реакции како алергиски реакции, иритации, црвенило, сувост или други здравствени проблеми, истите треба да се пријават со цел да се осигура безбедноста на другите потрошувачи и да се заштити јавноста.
Каде се пријавуваат несаканите реакции од употребата на козметички производи?
Производител или дистрибутер: На пакувањето обично има информации за контакт со одговорното лице или компанијата која го произведува/продава производот.
Регулаторни тела: Регулаторите, како што се Европската комисија или националните агенции, исто така прифаќаат пријави за несакани реакции.
На ваков начин, компаниите и регулаторните органи ќе можат да донесат информативни одлуки базирани на податоците од потрошувачите и истражувањата, со цел на пазарот да се пласираат исклучиво козметички производи без било каков здравствен ризик.
Здравиот и безбеден козметички пазар може да се гради само ако сите учесници — производители, регулатори и потрошувачи — бидат свесни за својата улога и одговорност. Безбедноста на козметичките производи не е само во рацете на производителите, туку и во нашата одговорност како потрошувачи да донесуваме правилни, информирани и свесни избори. Затоа, знајте што користите!
Секогаш избирајте производи кои се потврдени, проверени и кои исполнуваат високи безбедносни стандарди. Не се двоумете да пријавите несакани реакции, бидејќи секој потрошувач има право на безбедност и заштита на своето здравје!
