Габата Trichophyton предизвикува црвенило, чешање на кожата, распукување и лупење. Вообичаено место на „напад“ се стапалата, поточно просторот помеѓу прстите на нозете, кој е обично влажен и идеален за размножување на габи. Но инфекцијата не мора да биде ограничена само на оваа област: габите, исто така, може да ја нападнат и кожата на главата, оставајќи зад себе округли, црвени места, исто како и стомакот, каде што предизвикува чешање и отекување на кожата.
Жените се позаштитени од оваа напаст отколку мажите. Можеби затоа што често носат отворени сандали, па прстите им се суви и изложени на воздух, додека мажите најчесто носат затворени чевли и патики
Габите вообичаено се наоѓаат на нашата кожа, само е прашање на други фактори, кога ќе се активираат и размножат. Експертите во овие фактори ги вклучуваат генетската сензитивност, падот на имунитетот или појава на здравствени проблеми како што се лишаи, астма… Всушност, нема правила. Некои луѓе едноставно се почувствителни на габи од другите.
Инфекцијата се лекува со локално нанесување на антимикотици (лекови кои ги убиваат габите). Ако не реагирате на самиот почеток на инфекцијата, само една доза терапија нема да биде доволна за да се ослободите од оваа досадна инфекција. Дерматологот ќе препише повторна терапија, а во потешки случаи ќе даде и орален лек.
За да ја избегнете инфекцијата, обрнете внимание на хигиената на нозете. Туширајте се редовно и секој пат темелно сушете ги стапалата и просторот меѓу нозете со сува крпа. Кога сте во затворен простор, бидете боси колку што е можно повеќе.
Ако имате габична инфекција, дезинфицирајте ја бањата по туширање. Не го делете пешкирот со никого, а чорапите перете ги со топла вода. Редовно нанесувајте пудра на стапалата, која ќе ја апсорбира влагата. Доколку вашите стапала се заразени, габите, исто така, се наоѓаат во чевлите. Водете сметка и за тоа и секој ден дезинфицирајте ги со спреј или пудра против габични инфекции.
Борбата против габите често може да биде долготрајна. Затоа се препорачува навремена реакција, инаку терапијата може да потрае со месеци.
