Проблемите со покачено ниво на билирубин во крвта најчесто се поврзани со црниот дроб. Билирубинот настанува како производ на распаѓањето на црвените крвни клетки, а црниот дроб го разградува во жолчката, која понатаму се пренесува во жолчниот меур. Подоцна оваа жолчна боја се разградува во дигестивниот систем и на крајот се исфрла во најголем дел преку столицата, а помал преку урината.
Здрава личност во децилитар крв има помеѓу 0,3 и 1,9 милиграми билирубин. За луѓе со покачен билирубин, овие единици се многу поголеми, што може да влијае на целиот организам, а особено на црниот дроб.
Симптоми на покачено ниво на билирубин во крвта
Бидејќи билирубинот е тесно поврзан со работата на црниот дроб, неговите симптоми се оние кои укажуваат на неговата неправилна работа. Еден од главните симптоми е жолтицата.
Другите јасни симптоми се слични на грип, вклучувајќи треска, болки во телото и општ замор. Луѓето со покачено ниво на билирубин брзо се заморуваат и се чувствуваат поспани, дури и откако ќе преспијат цела ноќ. Непријатните симптоми можат да бидат придружени и со болки во стомакот и промени на кожата.
Болести поврзани со покачен билирубин во крвта
Зголеменото ниво на билирубин во крвта може да биде последица на нарушена работа на црниот дроб. Најчесто тоа е пореметување на метаболизмот наречено Гилбертов синдром. Луѓето со овој синдром имаат хронично покачен билирубин во крвта, но оваа тегоба можат да ја контролираат со здрав начин на живот.
Доколку со здрава исхрана, умерено вежбање и редовен одмор се контролира билирубинот, лицето може нормално да живее. Од друга страна, со прекумерна консумација на алкохол, прескокнување на оброци и нередовно спиење, билирубинот може да скокне и системски да го уништи црниот дроб и да доведе до цироза.
Зголеменото ниво на билирубин, исто така, може да биде предизвикано од разни болести, особено вирусни болести како што се хепатитис А и Б, автоимун хепатитис или алкохолен хепатитис. Исто така, нарушувањето може да биде последица и на консумација на некои лекови.
Зголеменото ниво на билирубин, исто така, може да биде поврзано и со хемолитичка анемија. Тоа е болест во која црвените крвни клетки засилено се распаѓаат. Наместо 120 дена во крвотокот, тие се распаѓаат значително порано. Бидејќи црниот дроб не може да апсорбира толку многу распаднати клетки, во крвта се зголемува нивото на билирубин. Оваа болест се јавува како последица на многу други болести, како анемија на српестите клетки, таласемија, автоимуна анемија, прееклампсија и многу други.
Лекување на покачено ниво на билирубин во крвта
Ако зголемениот билирубин доведе до жолтица, таа главно се лекува со ултравиолетови зраци, односно фототерапија.
Нивото на покачен билирубин во крвта може да се одржува релативно нормално најмногу со здрава исхрана. Луѓето кои имаат покачено ниво на билирубин во крвта треба целосно да ја исфрлат консумацијата на алкохол, газирани пијалаци, масна и слатка храна. Овие намирници лошо влијаат врз црниот дроб, ја забрзуваат цирозата и затоа треба да се избегнуваат.
Од друга страна, треба да се зголеми внесот на намирници кои помагаат во регенерација на црниот дроб, како што е младо сирење, сурутка и зеленчук, како блитва, спанаќ, брокула, зелка, кељ и ротквици
Исто така, пожелно е да се јаде лук, јајца и млади глуварчиња, а исклучително се здрави и артичоките. Од овошје е пожелно да се јадат јаболка, јаткасти плодови, здрави семиња, житарки и мешунки.
Оброците кај лица со ова нарушување треба да бидат чести. Може да бидат мали, дури и обични закуски, но гладувањето треба да се избегнува бидејќи го покачува нивото на билирубин во крвта и доведува до жолтица, а на крајот, и оштетување на црниот дроб.
Луѓето кои се склони кон зголемено ниво на билирубин во крвта, би требало почесто да се одмораат и помалку да се изложуваат на стресни ситуации. Исто така, тие треба редовно да вежбаат, но притоа да не се напрегаат многу.
