Повеќе од еден милион луѓе во светот закрепнале од новиот коронавирус,покажуваат официјалните податоци од Универзитетот Џон Хопкинс. Но, стручњаците велат дека патот назад кон целосно здравје не е ист за секого.
Времето на опоравување зависи пред се, од сериозноста на болеста. Некои пациенти ќе оздрават многу побрзо, за некои може да поминат недели, па дури и месеци за да се вбројат во закрепнати, додека кај некои последиците од КОВИД-19 може да остават трајни здравствени проблеми. Возраста, полот и останатите хронични заболувања го зголемуваат ризикот од сериозни симптоми во текот на заразата.
Колку е поинвазивен и подолг третманот што го добива болниот, толку подолго ќе трае и закрепнувањето од болеста.
- Што ако имам само благи симптоми?
Повеќето луѓе кои ќе заболат од КОВИД-19 ќе развијат само основни симптоми – кашлица или висока телесна температура. Но, тие може да искусат и болки во телото, замор, болка во грлото и главоболка. Кашлицата првично е сува, но некои луѓе на крајот е можно да започнат со кашлање на слуз која содржи мртви клетки на белите дробови клетки убиени од вирусот. Овие симптоми се третираат со одмор во кревет, многу течности и лекови за олеснување на болката.
Лицата со благи симптоми, според досегашните искуства, добро и брзо закрепнуваат.
Треската треба да се смири за помалку од една недела, иако кашлицата може да трае и подолго. Анализата на кинеските податоци на Светската здравствена организација (СЗО) вели дека во просек се потребни две недели за опоравување на пацинетите со ваков тип симптоми.
- Што ако имам посериозни симптоми?
За некои пациенти, болеста може да стане многу посериозна. Ова има тенденција да се случи околу седум до 10 дена од почетокот на инфекцијата.
Промената може да биде моментална и изненадна. Дишењето станува тешко и белите дробови се воспалени. Ова е се случува бидејќи имуниот систем на телото се обидува да се одбрани – што претставува прекумерно реагирање и телото доживува колатерално оштетување. Некои луѓе дури ќе треба да се хоспитализираат за да бидат ставени на терапија со кислород.
Лекарот Сара Џарвис вели: „Може да потрае и подолго време додека краткиот здив да се подобри. Може да поминат од две до осум недели за да се опорави пациентот, со константно чувство на замор“.
- Што ако ми е потребна интензивна нега?
СЗО проценува дека едно од 20 инфицирани лица има потреба од третман на интензивна нега, што може да вклучува и седација и ставање на респиратор. За тој пациент ќе биде потребно време да се опорави по престојот на интензивна нега. Пред ваквиот пациент да биде пуштен дома, тој мора претходно да биде преместен на редовен оддел.
Д-р Алисон Питхард, декан на Факултетот за интензивна нега, вели дека на пациентот може да му бидат потребни 12 до 18 месеци за да го врати своето здравје во нормална состојба.
Долгиот престој во болнички кревет доведува до губење на мускулната маса кај поединецот, и потребно е време мускулите повторно да се изградат. На дел од нив неопходна им е и физикална терапија за да можат повторноо да почнат да одат.
„Се чини дека има дополнителен елемент со оваа болест – вирусниот замор кој дефинитивно е огромен фактор“, вели Пол Тоуз, физиотерапевт за критична нега.
Постојат извештаи од Кина и Италија за пациенти кои чувствувале слабост во целото тело, останување без здив и при најмал напор, упорна кашлица и нерегуларно дишење, а имале и потреба од поголема количина на сон.
