Кога луѓето ќе изгубат 75 проценти или повеќе од своето богатство, имаат 50 проценти поголеми шанси да умираат порано отколку оние на кои тоа не им се случило, покажало новото истражување.
Истражувањето, објавено во списанието JAMA, проучувало како губењето на финансиската стабилност со текот на времето се одразува врз здравјето.
Линдзи Пул, доцент по превентивна медицина на Универзитетот Нортвестерн во Илиноис, и нејзините колеги, следеле повеќе од 8 700 лица на возраст од 51 до 61 години, кои учествувале во националната студија.
Тие набљудувале како „негативниот имотен шок“, дефиниран како губење на 75 проценти или повеќе од имотот, вклучувајќи ја и пензијата, домот или бизнисот, за две години, се одразува на смртноста.
Во тек на 20 години, 25 проценти од луѓето доживеале такво искуство и имале значително поголем ризик од смрт од различни причини.
„Тоа е нешто низ кое минуваат милиони луѓе“, изјавила Пул.
Добро е познато дека сиромаштијата се одразува на здравјето и смртноста, но научниците биле изненадени од податокот дека губењето на богатството има слично влијание на ризикот од предвремена смрт како и кога речиси воопшто се нема.
Истражувањето не проучувало како губењето на богатството директно се одразува на здравјето. Но „се претпоставува дека имотниот шок е стресен настан, а хроничниот стрес може долгорочно да се одрази врз речиси секој орган“, изјавила Пул.
