Артритисот е воспалителна болест на сврзното ткиво која најчесто ги зафаќа зглобовите. Иако постојат неколку различни типови на артритис – ревматоиден, псоријатичен и остеоартритис, третманот за сите е насочен е на намалување на воспалението.
Редовното консумирање на некои намирници е тригер за појава на болни отоци, поради што лекарот може да ве упати на т.н. елиминациска диета за да се утврди кои намирници ви пречат. Ова се намирници кои најчесто создаваат потешкотии на лицата со артритис. Особено внимание обрнете на солта и заситените масти.
МЛЕЧНИ ПРОИЗВОДИ
Млечните производи содржат вид на протеин кој се смета дека го иритира сврзното ткиво околу зглобовите. Тој не им пречи на сите, но на возрасните лица и онака не им е потребна исхрана каде доминираат млечните производи и млекото. Протеините од нив може да се надоместат со консумирање на намирници како киноа, леќа, тофу, грав и спанаќ.
МСГ ( Monosodium glutaminat)
Адитивите во храната, особено се проблематични за лицата со артритис, а МСГ е најдобриот пример. Тоа е прав на база на сол кој се додава во бројни преливи за салата, соја сосот, мешавините за супа, брзата храна и месните деликатеси. Главниот проблем всушност го предизвикува натриумот присутен во него, кој може да доведе до задршка на вода и појава на отоци.
АЛКОХОЛ
Консумирањето алкохол го зголемува ризикот од појава на гихт, болест која може да предизвика артритис, особено во стапалата. При гихт, мочната киселина не се метаболизира правилно, создавајќи мали кристали кои штетно делуваат на зглобовите и доведуваат до воспаление.
СОЛ
Солта е уште една намирница на која се предупредуваат пациентите со артритис, поради можноста за предизвикување на воспаление на зглобовите. Солта не влијае на секој организам исто, но повеќето луѓе ја консумираат во претерани количини.
ЗАСИТЕНИ МАСТИ
Консумирањето на храна богата со заситени масти ги влошува воспалителни состојби кај артритисот, особено во масното ткиво. Воспалението во масното ткиво укажува и на можна болест на срцето. Најоптоварени извори на заситени масти се полномасните млечни производи, црвеното месо, како и пржената и преработена храна.
ОМЕГА-6 МАСНИ КИСЕЛИНИ
Со оглед дека вишокот на омега-6 масни киселини ги активира воспалителните хемикалии кои се ослободуваат во телото, лекарите советуваат да се постигне подобар размер на омега-6 и омега-3 со користење на маслиново масло, и додавање на семки од лен и од тиква во исхраната.
РАФИНИРАНИ ЈАГЛЕХИДРАТИ
Белото брашно кое се наоѓа во многу производи, како леб, бисквити, колачи и житарки, толку е преработено што нема хранлива вредност како изворната пченица. Рафинираните јаглехидрати се разградуваат во шеќер во телото и предизвикуваат воспалителни процеси, што ги зголемува цитокините и останатите провоспалителни соединија во крвотокот.
