Со години научниците се сомневаа дека Епштајн-Баровиот вирус (ЕБВ) најпознат по тоа што предизвикува мононуклеоза, исто така може да има улога во појавата на мултипла склероза, а сега нова студија го поткрепи ова тврдење.
Студијата, во која учествувале над 10 милиони лица, покажала дека ризикот од развој на мултипла склероза се зголемил 32 пати по инфекција со Епштајн-Баров вирус.
Инаку, Епштај-баровиот вирус е сеприсутен, со околу 95% од популацијата која во некој момент ќе се зарази. Многумина со него се заразуваат како деца, кога обично не придзвикува никакви симптоми. Кога луѓето ќе се заразат како тинејџери или млади возрасни, тоа може да предизвика мононуклеоза.
Со текот на годините, бројни студии сугерираа дека, кај мал број лица, Епштајн-Баровиот вирус може да помогне во зголемување на ризикот од мултипла склероза, невролошка болест што е предизвикана од погрешен напад на имуниот систем на сопственото нервно ткиво.
Лицата кои имале мононуклеоза, на пример, имаат поголем ризик од развој на мултипла склероза од оние кои никогап немале симптоми од ЕБВ инфекција. Исто така, лицата со мултипла склероза може да покажат високо ниво на антитела против Епштајн-баровиот вирус неколку години пред да се појават симптоми на мултипла склероза. Треба да се напомене дека научниците исто така пронашле Б-клетки инфицирани со ЕБВ, во мозокот на пациенти со мултипла склероза.
Сето ова сугерира дека нешто поврзано со имунолошкиот одговор на ЕБВ инфекцијата може, кај некои луѓе, да поттикне развој на мултипла склероза.
