Иако во повеќето случаи не е алармантно, крвта во урината треба да се сфати многу сериозно. Можно е да се работи за поголем здравствен проблем кој бара сериозен лекарски пристап.
Симптомите на можни состојби кои предизвикуваат крв во урината често се преклопуваат, а експертите предупредуваат на некои рани знаци кои не треба да се занемарат.
- Инфекција на уринарниот тракт
До неа доаѓа кога бактериите се размножуваат во вашиот мочен меур или уретрата. Покрај тоа што ќе забележите крв во урината, веројатно постојано ќе имате чувство дека мора да се измокрите, а во текот на мокрењето ќе чувствувате пецкање. Во посериозни случаи, може да имате болки во абдоминалната празнина и препоните. Понекогаш, особено кај постарите лица, симптомите може да бидат целосно отсутни. Инфекцијата на уринарниот тракт е чест проблем и се лекува со антибиотска терапија.
Воспаление на бубрезите
Инфекцијата на уринарниот тракт може да се прошири на бубрезите. Симптомите на двете состојби се слични, но кај воспаление на бубрезите често се јавува покачена температура и болка во пределот на бубрезите. Освен тоа, воспалението на бубрези е посериозна состојба која може да се прошири на другите органи во телото. Затоа, посетете лекар ако се појават некои од наведените симптоми.
- Камења во бубрезите
Тие се формираат во вашите бубрези како последица на прекумерна акумулација на калциум и други минерали во организмот. Камењата во бубрезите предизвикуваат силна болка, особено во грбот, колковите и ребрата – ако пораснат големи. Ќе забележите крв во урината, можеби дури и мали парчиња камења кои понекогаш сами патуваат кон уринарниот тракт и завршуваат во урината. Ако тоа не се случи, веројатно ќе ви треба операција за да го решите проблемот.
- Воспаление на простатата
Инфекција, операција или ненадеен удар во оваа мала жлезда која се наоѓа во близина на машкиот мочен меур може да предизвика воспаление на простатата. Освен што ќе забележите крв во урината, ќе се појават и проблеми со мокрењето – наеднаш ќе имате потешкотии при мокрењето или ќе почувствувате болка при мокрењето. Исто така, може да почувствувате болки во препоните и долниот дел на стомакот во текот на вршење голема нужда или ејакулација. Лекувањето зависи од причината за воспалението, но најверојатно ќе ви требаат антибиотици и лекови против болки.
- Акутен нефритичен синдром
Оваа состојба може да ги оштети ситните филтри во бубрезите, што ја отежнува нивната основна функција на прочистување на урината. Пациентите обично не се свесни за оваа болест додека лекарот не ја дијагностицира со тестирање на примерок од урина.
Симптомите вклучуваат крв во урината, како и пенлива и кафеава урина, а може да забележите оток на лицето, нозете или стомакот. Оваа состојба може спонтано да се смири, но ако тоа не се случи, треба да се лекува за да се спречи оштетување на бубрезите.
- Полицистични бубрези
Гените што сте ги наследиле од вашите родители може да предизвикаат раст на мали цисти исполнети со течност во вашите бубрези. Тие можат да ги оштетат бубрезите и да предизвикаат појава на крв во урината.
Повеќето пациенти првите симптоми ќе ги забележат на возраст од 30-40 години, но има и некои рани знаци на оваа болест: зголемен стомак, чести инфекции на уринарниот тракт и болка во пределот на грбот и бубрезите.
Ако боледувате од оваа болест, веројатно ќе имате покачен крвен притисок и ќе чувствувате тремор и болка во градите. Не постои лек за оваа болест, но лекарите можат да ви помогнат да ги ублажите симптомите.
- Напорно вежбање
Крвта во урината почесто се појавува кај тркачите отколку кај другите спортисти. Сепак, оваа појава не е честа и лекарите се уште не ја знаат причината. Тоа може да биде губење на течноси во организмот, повреда на мочниот меур или разградување на црвените крвни зрнца за време на аеробни вежби.
- Лекови
Некои лекови, како што се пеницилин или циклофосфамид кои се користат за лекување на рак, може да предизвикаат крв во урината. Истото може да се случи и ако земате аспирин или хепарин, особено ако ги земате овие лекови додека боледувате од инфекција на уринарниот тракт.
