Многу често болестите на ноктите се симптом на истовремена болест, па затоа е важно да им се обрне внимание и на промените во нивниот изглед. Болестите на ноктите се нарекуваат со општ назив онихопатии. Тие можат да бидат наследени или стекнати како резултат на физичка траума, микози, работа со хемикалии…
Една од најчестите болестите на ноктите е онихомикозата (габична инфекција). Првично болеста тече незабележливо, а потоа ноктите стануваат кршливи, груби, жолтеникави, задебелени, а болеста е проследена со болно чувство под ноктите и непријатна миризба. Причина за болеста често е недостатокот на добра лична хигиена, спурување на нозете од носење на синтетички чорапи и неквалитетни чевли, слаб имунитет, одење бос на јавни места (околу базен, на пример). Шест до осум проценти од населението страда од онихомикоза.
Друго заболување на ноктите е микронихијата (мали и кратки нокти), што може да се појави како генетски дефект, а може и да е резултат на онихофагијата или грицкање нокти. Анонихијата е ретко среќаван здравствен проблем кој се карактеризира со недостаток на една или повеќе ноктни плочки. Заболувањето може да е генетско или како причина за него да биде физичка траума, некоја инфекција… Појавата на мали бели дамки по ноктите која вообичаено е резултат на авитаминоза е често среќавана состојба на ноктите.
Чест проблем со ноктите е враснувањето. Најчесто од оваа состојба страда палецот на ногата. Причината може да биде носењето тесни и заострени чевли, неправилно и премногу длабоко сечење на ноктите, инфекција…
Онихогрифоза е состојба која се појавува кај повозрасните лица и најчесто е предизвикана од прекумерен притисок, создавање инфекција од обувки и траума. Таа често се јавува како придружен ефект на ревматоидна болест или васкуларни лезии кај дијабетес. Ноктите најчесто на стапалото стануваат криви, задебелни, крути, со промена на боја и нерамни.
Како медицински тремини кои ја објаснуваат состојбата на ноктите се јавуваат и онихолиза, нарушување при кое ноктот спонтано се одделува од подлогата. Онихорексис е состојба на премногу кршливи нокти.
