Болката во долниот дел од грбот не е специфична болест, туку симптом кој може да биде предизвикан од разни акутни и хронични процеси во грбот, а може да биде и рефлекс на процеси во стомачната празнина и малата карлица, кога болката од споменатите подрачја се рефлектира во долниот дел од грбот.
Може да биде акутна појава, кога болките траат до три месеци, и хронична кога трае подолго.
Во повеќето случаи одморот и поштедата од физичка активност, како и примена на лекови против болки се доволни за да се реши проблемот за неколку недели. Меѓутоа, ако и после 72 часа пречките не почнат да се повлекуваат, потребно е да се појде на лекар.
Долниот дел од телото ја прави осовината на нашето тело и учествува во речиси сите активности. Зголемената телесна маса, постојаното оптоварување и кревање тешки товари, стрес, истегнување на мускули и лигаменти на грбот може да бидат причини за болка. Во одреден број случаи не се наоѓаат сигурните причини за болката, и покрај соодветните тестови.
Специфичните причини за болка во долниот дел од грбот кај кои се знае причината се: дискус хернија (доаѓа до помало или поголемо излегување на плочките кои се сместени меѓу два прешлена и до притисок на нервите), ишијас (остра болка од задната страна на ногата со можна појава на трнци во ногата или стапалото, а може да се јави и слабост во ногата, така што не може да се застане на прсти), спондилоза (таа е последица на дегенеративни процеси на ’рбетниот столб и се карактеризира со оковчување), стеснување на спиналниот канал (стеснувањето на просторот околу ’рбетниот мозок и корените на ’рбетните нерви настанало заради коскени израстоци), спондилолистеза (состојба во која еден прешлен лизнува кон напред).
Како се манифестира?
Тапата или остра болка во долниот дел од грбот која се влошува на движења, а се смирува во одредени положби е карактеристична појава. Може да се јавува само во подрачјето на крстот или да се шири кон едната или двете нозе, напред или позади.
ДИЈАГНОЗА
Кога симптомите се благи и се поправаат при физичка поштеда и лекови против болка, не е потребна специфична терапија, ниту анализи. Во случаите кога нема знаци на подобрување и после 72 часа, потребно е да се направат дополнителни испитувања. Дополнителни анализи се рендген на лумбосакралниот дел, ЕМНГ на долните екстремитети, скенер и нуклеарна магнетна резонанца на ’рбетот.
ТЕРАПИЈА
Во поблагите случаи доволно е само да се мирува неколку дена. Можат да помогнат и облоги. Физикалната терапија со ултразвук, електрична стимулација, ласер и сл. се препорачува откако ќе се смират акутните тегоби. Со земање на нестероидни антиревматици се намалуваат воспалението и болките. Во потешки случаи може да се дадат и кортикостероиди, а во случаите на хронични болки се применуваат и антидепресиви, опиоиди, акупунктура. Кај специфичните причини и потешките случаи потребно е и оперативно лекување.
