Хипертензијата или високиот крвен притисок може да направи голема штета на здравјето и пред самите да обрнете внимание на симптомите. Ако не се лекува, може да влијае на виталните органи како што се бубрезите, срцето и мозокот.
Од Центарот за превенција и контрола на болести (ЦДЦ) велат дека крвнуот притисок нормално се зголемува и намалува во текот на денот, но проблемите со здравјето настапуваат ако долго време неговото ниво биде превисоко.
Да се има под контрола крвниот притисок е клучен чекор за заштита на целокупното здравје и буквално може да значи разлика помеѓу животот и смртта. Факт е дека многумина кои имаат хипертензија не се свесни за тоа и на тој начин не ја контролираат состојбата. Единствениот начин да се утврди дали имате проблем е често мерење на крвниот притисок и посета на лекар доколку е потребно.
ХИПЕРТЕНЗИЈА МОЖЕ ДА СЕ СЛУЧИ НА СЕКОЈ, СЕКОГАШ
Д-р Бајо Кари-Винчел, лекар за итна медицина од болницата Сент Мери, истакнува дека оваа состојба може да се појави во секое време, без оглед на возраста. Постојат фактори кои можат да влијаат на развојот на состојбата, а тоа се постоење на болест во семејството, пушење цигари и неактивност.
ЦДЦ предупредува дека дури едно од четири лица на возраст меѓу 20 и 44 години имаат проблеми со крвниот притисок, а високиот крвен притисок може да влијае на развојот на срцеви заболувања, а експертите сметаат дека е забележан пораст на срцеви удари особено кај младите луѓе, а сметаат дека директна врска е токму прекумерната телесна тежина. Крвниот притисок е исто така поврзан со деменција, а се чини дека тука времето е исклучително важно – доказите покажуваат дека неконтролираната хипертензија во средната возраст може да значи зголемен ризик од развој на деменција во подоцнежниот живот.
СИМПТОМИ НА ХИПЕРТЕНЗИЈА
Д-р Кари-Винчел наведува дека ЦДЦ предупредува дека крвниот притисок од 130/80 mm Hg или повисок се смета за хипертензија. Важно е да знаете дека често нема симптоми, но некои од нив може да се појават често и тоа кога состојбата е веќе напредната, а се однесуваат на болка во градите, потешкотии со дишењето. Тука се и промени во видот, главоболки и крварење од носот кои може да се појават како симптоми.
Д-р Евелин Хуанг, докторка за итна медицина, додава дека често нема проблеми, но потврдува дека болката во градите е еден од нив, а тука е и вртоглавица.
ШТО МОЖЕ ДА НАПРАВИТЕ ЗА ДА СПРЕЧИТЕ ХИПЕРТЕНЗИЈА?
Внимавајте на здрава исхрана: Овој совет можеби е најважен: кога станува збор за целокупното здравје, вклучувајќи го и крвниот притисок, запомнете дека исхраната е секогаш исклучително важна.
Најдоброто нешто за контрола на крвниот притисок во зима е здрава и правилна исхрана. Совет е да јадете многу свеж зеленчук и овошје, да внимавате на внесот на сол, а секако треба да го намалите и внесот на преработена храна која е многу штетна за здравјето. Советува наместо сол, да користите зачини за да додадете вкус на оброците, но и да придонесете за здравјето на организмот. Лукот и пиперката ќе помогнат во регулирањето на крвниот притисок.
Одморајте: Ако одморот го сметате за приоритет, веројатно ќе забележите дека тоа ќе влијае на нивото на крвниот притисок. Обидете се со активности што смируваат, како што се медитација и јога, кои ќе ги релаксираат мускулите и ќе го намалат нивото на стрес, два важни фактори за намалување на крвниот притисок.
Квалитетниот сон е приоритет: Освен релаксацијата, важно е и да си дозволите добро да се одморите во текот на ноќта. Недостатокот на сон е поврзан со зголемен ризик од срцеви заболувања, дијабетес, обезност, бубрежни заболувања, развој на деменција, а она што е особено важно е дека недостатокот на сон резултира со послаб имунитет! Како да препознаете дека страдате од недостаток на сон? Во текот на две недели, водите евиденција за тоа колку часа спиете. Ако спиете во просек помалку од седум часа, тогаш сте лишени од сон. Решението е на дофат на рака – спијте, надополнете го изгубеното време за спиење и во рок од десет дена ќе ја забележите разликата.
