Пред да дозволите д-р Гугл да ве увери како зад вашата главоболка всушност се крие карцином на мозокот во терминална фаза, знајте дека постојат многу поуверливи објаснувања за овој и други вообичаени симптоми од кои стравувате.
Болка во градите
Штом се спомене болка во градите, прва работа на која помислуваме, независно од возраста е срцев удар. Но, ако се во прашање млади пациенти кај кои не постои никаков ризик од кардиоваскуларни болести, веројатно станува збор за нешто минливо.
Во повеќето случаи кај младите лица, болката во градите е поврзана со жиговина, стрес или анксиозност, а може да станува збор за истегнување на граден мускул при вежбање. Но, ако болката не се смирува, побарајте лекарска консултација.
Срцебиење
Како и болката во градите, и забрзаната работа на срцето не мора веднаш да биде знак дека боледувате од некоја кардиоваскуларна болест. Кога срцето силно чука тоа може да биде застрашувачко, но причини може да има многу: од стрес, дехидрација, па се до недоволно сон или премногу кофеин.
Ако прескокнување на срцето стане редовно или е проследено со болка во градите и краток здив, посетете лекар.
Тресење на рацете
Немојте сами да си дијагностицирате Паркинсонова болест веднаш штом забележите дека ви се тресат рацете. Оваа болест обично почнува на едната страна на телото, а тресењето на рацете се јавува во комбинација со вкочанетост, забавени движења и потешкотии со координацијата на движењата.
Може да станува збор за ниско ниво на шеќерот во крвта или проблеми со тироидната жлезда, или едноставно да е само есенцијален тремор кој е вознемирувачка, но бенигна појава. При есенцијалниот тремор ќе забележите дека рацете се тресат само во некои слуачеви, како на пример кога сакате нешто да дофатите со рацете.
Крв во столицата
Доколку во столицата одеднаш ви се појави крв, може сериозно да се загрижите, но најчесто се работи за безопасна појава, особено кај младите луѓе. Можно е во исхраната да немате доволно влакна, поради што ве мачи запек.
