Изгледа дека дамнешниот совет дека намалувањето на тежината, меѓу другото, може да се оствари и со побавен внес на храна почнува да станува се пореалeн. Според една неодамнешна студија, брзото консумирање храна го зголемува ризикот од гојазност, но и од одредени болести, како дијабетес и заболувања на срцето.
Резултатите од истражувањата укажуваат на тоа дека поединците кои јадат брзо можат повеќе и да изедат количински, затоа што нивниот организам нема време да сфати дека и кога е сит. Заради тоа да се јаде побавно е многу подобро за севкупното здравје на човекот.
За потребите на оваа студија истражувачите набљудувале повеќе од 1 000 учесници на средни години. Врз основа на постигнатите резултати, оние кои јаделе побрзо имаат по пет и пол пати поголеми шанси да развијат метаболен синдром во споредба со оние кои јадат побавно. Овој синдром подразбира збир од различни здравствени состојби како што се гојазност, висок крвен притисок, шеќер во крвта и холестерол.
„Побавното јадење може да биде пресудна промена во нечиј стил на живеење за да се спречи метаболниот синдром“, вели Такајуки Јамаџи, кардиолог од Универзитетот во Хирошима во Јапонија и еден од авторите на оваа студија.
Метаболниот синдром се јавува и кога личноста покажува кој било од факторите на ризик поврзани со дијабетес и срцеви заболувања, како што се абдоминална гојазност (во пределот на стомакот), високо ниво на шеќер во крвта, висок крвен притисок, високи триглицериди и низок „добар“ ХДЛ холестерол.
Доктор Јамаџи и неговите колeги проучувале 642 мажи и 441 жена на просечна возраст од 51 година кога започнала студијата, во 2008 година. Сите учесници биле здрави на почетокот на студијата и од нив било побарано да ја оквалификуваат вообичаената брзина за време на јадењето како споро, нормално или брзо, за потоа да бидат поделени во три категории, според таа брзина.
Учесниците повторно биле прегледани пет години подоцна, а доктор Џамаџи дошол до следните заклучоци:
„Кога луѓето јадат брзо се склони на тоа да не се чувствуваат сити, па се случува прејадување. Брзото јадење предизвикува поголема флуктација на глукоза и може да доведе до инсулинска резистенција. Метаболниот синдром е една од причините за кардиоваскуларни болести, а брзината на јадење е поврзана и со зголемувањето на телесната тежина“, навел јапонскиот кардиолог. За време на петгодишното следење кај 84 учесници е дијагностициран метаболен синдром.
Во одделна студија на експертите од американскиот универзитет во Северна Каролина потврдено е дека поефикасно е да се јаде или ужива во секој залак за време на оброкот, фокусирајќи се на вкусот на храната која се зема, за да се „јаде со цел“, што воедно им помага на поединци полесно да загубат тежина во однос на личностите кои држат диета.
Научниците ги советувале луѓето да се воздржат од одвлекување внимание за време на јадењето, како што е исклучување на телевизорот или мобилниот телефон. Учесниците со прекумерна тежина кои пробале да јадат побавно загубиле и до два килограми за 15 недели, додека оние на режим на диететска исхрана само 300 грама. Шест месеци подоцна, односно откако престанало истражувањето, три четвртини од учесниците ја задржале својата тежина или дури и уште повеќе ослабеле.
