![BRAK1](https://panacea.mk/wp-content/uploads/2018/10/BRAK1-696x464.jpg)
Од проблемите во бракот здравствени последици имаат само мажите, покажало најново истражување. Припадниците на посилниот пол, кои често се караат со своите партнерки, патат од несоница и мигрена.
Караниците со партнерот може да имаат и емотивни и физички последици. Меѓутоа, се покажало дека, кога во прашање е здравјето, последиците од карањето се многу поголеми кај мажите, отколку кај жените.
Ова истражување, спроведено на Универзитетот во Невада, траело полни 16 години. Тоа покажало дека во браковите во кои имало повеќе конфликти, мажите имале повеќе здравствени проблеми и почесто страдале од главоболка, несоници и имале полоша здравствена состојба.
Водачот на истражувањето, Роуз Шраут вели дека довербата и разбирањето меѓу партнерите се многу важни во секоја врска.
„Кога се караат, мажот и жената, еден кон друг се многу непријателски настроени. Тоа предизвикува разни непријатности, меѓу другите, и здравствени. Истражувањата кои се спроведени паралелно со овие, покажале дека расправиите предизвикуваат многу стрес и го уништуваат имунитетот кај луѓето, односно имаат негативно влијание на кардиоваскуларниот систем„ , објаснува таа.
Истражувачите ги прашувале брачните парови дали во изминатите години се карале околу една од шесте најчести теми за расправија, а тоа се парите, децата, веросповед, како ќе го поминуваат слободното време, односот со семејството на партнерот и односот со сопствената фамилија. Потоа ги прашувале за здравјето и колку нивната здравствена состојба влијае на нивните деловни обврски и дали во изминатата година биле доволно здрави. Ги прашале и дали слободното време го поминуваат правејќи го она што го сакаат, дали имаат потешкотии со спиењето, дали се чувствуваат нервозно или фрустрирано и дали страдале од главоболки. На скала од еден до пет, истражувачите одличното здравје го оценувале со петка, а честата склоност кон разболување со единица.
Паровите кои во почетокот на бракот не се карале често, во просек добиле оценка 4,07, додека паровите кои често се карале, здравствено биле оценети со 3.86. Следејќи ја здравствената состојба на брачните другари во наредните 16 години, се покажало дека општатата здравствена состојба не се променила значително.
Меѓутоа, интересно е дека, разликата во резултатите во целост зависела од здравјето на мажите во бракот. Се утврдило дека караниците немале никакво влијание на здравјето на жените.
Мажите кои се карале со своите жени поради различни причини, како што се финансии, семејни односи или воспитувањето на децата, биле со значително полоша здравствена состојба од мажите кои помалку се карале со своите жени.
Во најлоша здравствена состојба биле оние мажи кои се карале од самиот почеток, нагласуваат истражувачите.