Причини зошто жените ја одложуваат бременоста има многу, но има и многу фактори на ризик кога станува збор за бременост по 35-та од животот на жената. Прв и основен фактор е тоа што со возраста се намалува плодноста, чиј врв, според експертите, е некаде меѓу 20-та и 25-та година. По 30-та година постепено почнува да се намалува, а намалената плодност всушност се поврзува со поретката овулација.
Пред бременоста исклучително важна е здравствената состојба на секоја жена, па затоа се потребни редовни лекарски прегледи. Само така полесно може да се утврдат можните проблеми, пречки или компликации. Во поголемиот број случаи подоцнежната бременост е поризична отколку кај младите жени, затоа и гинекологот е должен да ги посочи можните ризици и за мајката и за детето.
Во подоцнежна возраст жените почесто имаат проблеми со репродуктивниот систем, како што се миоми, блокирани јајници или ендометриози. Покрај тоа, почесто се јавува и покачен притисок, дијабетес или проблеми со бубрезите отколку кај помладите трудници. Освен со болести, ваквата бременост често завршува и со предвремени породувања, царски рез или со мртвородено дете.
Поголемиот број спонтани абортуси се случуваат во првото тромесечие на бременоста, без оглед на годините на трудницата, но сепак ризикот кај повозрасните од 35 години е далеку поголем и тој според една статистика изнесува 25 % од случаите. Ризикот од спонтан абортус кај повозрасните жени го зголемува и зголемената појава на хромозомските аномалии, а една од најчестите е и Дауновиот синдром.
Сепак, и покрај ризиците, голема е веројатноста ништо од сето наброено да не влијае на бременоста на жената и крајниот исход да биде нормална бременост, здраво дете и здрава мајка.
