Жените кои имаат покачен крвен притисок или прееклампсија за време на бременоста се изложени на поголем ризик од хипертензија, дијабетес тип 2 и покачен холестерол по бременоста, покажала новата студија.
Појавата на овие фактори на ризик за срцеви заболувања кратко време по бременоста може да помогнат во објаснувањето зошто жените со споменатите нарушувања имаат зголемен ризик од срцев удар и мозочен удар подоцна во животот.
Многу научници веруваат дека бременоста делува како стрес-тест за срцеви заболувања и помага да се идентификуваат жените кои се предиспонирани за развој на висок крвен притисок и други кардиоваскуларни фактори на ризик
Сознанието дека прееклампсијата го зголемува ризикот од кардиоваскуларни компликации подоцна во животот може да помогне во одлуката да се преземат превентивни мерки за кардиоваскуларни болести, како што се здравата исхрана и физичката активност.
Се проценува дека гестациската хипертензија или прееклампсијата се јавува кај 15 % од жените во најмалку една бременост.
Покрај превисокиот крвен притисок, прееклампсијата е придружена со потешкотии со црниот дроб и бубрезите, пишува стручниот магазин „Annals of Internal Medicine“.
Во ова истражување учествувале речиси 60 000 жени кои немале срцеви заболувања или кој било познат фактор на ризик за срцеви заболувања на почетокот на студијата. Сите жени во студијата родиле барем еднаш на возраст помеѓу 18 и 45 години и биле следени во просек од 25 до 35 години после првата бременост.
