Одржувањето на оралното здравје за време на бременоста е исклучително важно како за мајката, така и за бебето. Бременоста освен што го зголемува ризикот од појава на разни болести на непцата, одредени инфекциите на забите се поврзуваат и со предвремено породување.
За да се спречат можни нарушувања на здравјето и на мајката и на бебето, трудницата треба задолжително да го информира својот стоматолог во врска со бременоста. На тој начин, тој подобро ќе го испланира евентуалниот третман или процедура во усната шуплина. Според стоматолозите, рутинските стоматолошки прегледи најдобро е да се прават во вториот триместар од бременоста. Се препорачува избегнување на какви било стоматолошки третмани во првиот триместар и во втората половина од последниот триместар бидејќи се најкритичните периоди во бременоста и можат да влијаат врз развојот на бебето.
Стоматологот мора да знае се во врска со сите лекови и дози кои ги зема бремената жена, вклучувајќи ги лековите и пренаталните витамини препишани од матичниот гинеколог и да се следат советите препорачани од него.Особено е важно за време на бременоста жената да не се изложува на зрачење. Доколку зрачењето е неопходно, стоматологот треба да употреби штит при зрачењето со што ќе ја заштити и трудницата и плодот кој го носи
ПРЕВЕНТИВА
- Не го прескокнувајте стоматолошки преглед бидејќи сте бремена.
- Одржувајте хигиена на забите и на уста со цел да спречите гингивални проблеми. Четкајте ги забите двапати дневно, најмалку по две минути и отстранете ги наслагите од забите. Користете конец најмалку еднаш во денот. Користете квалитетна четка и паста за заби која содржи флуорид.
- Доколку имате проблем со утринска мачнина проследена со честии нагони за повраќање, наутро плакнете ја устата со вода или плакнач за уста.
- Избегнувајте слатки оброци. Потребата за благо е честа во текот на бременоста. Затоа, имајте на ум дека што почесто јадете слатки толку се поголеми шансите да ви се расипат забите. Од друга страна, некои бактерии кои предизвикуваат расипување на забите кај мајката можат да се префрлат на бебето. Затоа внимавајте што јадете и во колкави количини.
- Јадете здрава и разновидна храна. Првите заби на бебето почнуваат да се развиваат во третиот месец од бременоста. Храна која содржи млечни производи од типот на сирење и јогурт е добар извор на основни минерали и е добра за забите, непцата и коските на бебето.
- Доколку имате потреба од итен стоматолошки третман, задолжително консултирајте се со стоматологот дали воопшто смеете да примите анестезија или други лекови кои би можеле да ја искомплицираат вашата бременост. За таа цел, кажете му ги сите потребни информации за вашата бременост, така стоматологот правилно ќе го испланира третманот.
- Доколку имате проблем со непцата, од типот на гингивитис или тумор за време на бременоста, веднаш обратете се кај стоматолог. Тој ќе направи целосно испитување на вашата уста и проценка на пародонтот.
