Најново истражување покажало дека новиот коронавирус SARS-CoV-2 може да предизвика абнормалности на белите дробови и повеќе од три месеци по инфекција со вирусот.
Во истражувањето што било направено на Универзитетот Оксфорд, научниците користеле нова техника на набљудување како би ги идентификувале оштетувањата кои не биле воочливи со класично испитување.
Како што се наведува, научниците користеле гас ксенон при скенирањето со магнетна резонанца, за да ги добијат снимките на оштетувањата на белите дробови.
Новата техника се состоела од тоа да пациентите при снимањето вдишуваат гас, а таквиот начин на снимање бил направен кај 10 пациенти на возраст од 19 до 69 години, од кои осуммина имале краток здив, а некои се жалеле на замор и три месеци по болеста, иако не биле хоспитализирани на оддел за интензивна нега за време на болеста.
За време на скенирањето кај тие осум пациенти се покажале оштетувања на белите дробови со истакнување на подрачјата во кои воздухот не одел лесно во крвта.
Поради првичните наоди на истражувањето, во план е испитување на уште 100 лица, за да се утврди дали тоа се случува и кај пациентите кои немале силни или кои воопшто немале никакви симптоми на КОВИД-19.
Целта, велат научниците е да се открие дали оштетувањето на белите дробови постојано се случува и дали е трајно или привремено.
