Рани резултати од истражување за нов тест на коронавирус отвораат можност за “брзо препознавање“ на инфекцијата и резултатите би биле готови за неколку секунди, наместо за неколку часа. Британската студија покажала дека со методата на анализа на здивот, може веднаш да се дознае дали лицето е позитивно на коронавирус.
Резултатите се објавени во стручното списание Lancet, по помало испитување на новиот тест на пациенти во Шкотска и Германија.
Експертите велат дека нивните уреди би можело да бидат подготвени за употреба за шест месеци, доколку навреме се обезбедат финансиски средства.
“Примерокот може да се земе многу брзо, тестот е неинвазивен и не е потребно персоналот да биде посебно облечен за да собира примероци. За само неколку минути го добивате резултатот“, велат научниците.
Првично, технологијата се користела за развивање тестови за откривање на болести како рак на бели дробови и за брзо разликување на бактериски и вирусни респираторни болести, но со оглед на пандемијата со новиот коронавирус, одлучено е дијагностичките методи да се применат за откривање на КОВИД-19.
Принципот функционира така што се анализираат хемикалиите од здивот на пациентите, кои би можеле да дадат одговор на прашањето од што боледува пациентот и дали има респираторни проблеми. Со тестовите се успеало да се открие и трага од КОВИД-19 во хемикалиите, што подоцна е потврдено до класичниот брис од нос и грло.
Во 80 проценти од случаевите со ваквото тестирање успешно се предвидело дали пациентот боледува од КОВИД-19, при што тестот ја разликувал оваа болест од останатите кои со себе носат проблеми со дишењето, како астна или бактериско воспаление на белите дробови.
“Ако се покажае сигурна, оваа технологија нуди можност за брзо откривање на КОВИД-19 во одделите за инти случаи или во примарната здравствена заштита, што ќе придонесе за поквалитетна работа со пациентите и безбедност за медицинскиот персонал“, заклучуваат научниците.
