![Ripe Broccoli Cabbage Isolated on White](https://panacea.mk/wp-content/uploads/2019/05/brokula-696x463.jpg)
Научниците сметаат дека во лекувањето на шизофренијата значително би можела да помогне брокулата. Истражувачите од САД откриле дека болните од шизофренија кои имаат пониско ниво на невротрансмитерот глутамат и антиоксидантот глутатион, тоа ниво можат да го повратат со екстрактот од брокули. Во истражувањата користеле органско соединение сулфорафан, добиено од никулци од брокула.
Стручњаците веруваат дека резултатите од истражувањата би можеле да отворат нови можности на лекувањето на шизофренијата во иднина, кои не се потпираат на силни лекови што имаат несакани ефекти како што се неволни движења, вкочанетост, немир, треперење…
Во студијата на истражувачите од болницата „Џон Хопкинс“ во Балтимор учествувале две групи луѓе – 91 здрава личност и 81 личност со шизофренија. Учесниците во просек имале 22 години, а 58 отсто биле мажи. Истражувачите користеле инструменти за мерење и споредување на работата на пет региони во мозокот меѓу двете групи луѓе. Откриле дека болните од шизофренија во просек имаат за четири проценти пониско ниво на глутамат во предниот дел од кортексот на мозокот, кој влијае на емоциите, вниманието, донесувањето одлуки… Научниците, исто така, откриле дека оние кои имале шизофренија имале во просек по три отсто помалку глутатион во истиот дел од мозокот и осум проценти помалку во таламусот. Си поставиле задача да пронајдат начин за воспоставување рамнотежа, така што ќе се ослободи глутамат кога го нема доволно или да се „складира“ ако го има премногу. Девет здрави личности кои учествувале во истражувањето земале по две капсули со 100 микромоли сулфорафан во облик на екстракт од брокула еднаш дневно, во текот на една недела. Тимот на начуници открил дека кај нив после седум дена дошло до зголемување на просечните нивоа на глутатион за околу 30 отсто.
Неопходни се испитувањата на дејствата на сулфорафанот од брокулата.
Научниците велат дека се потребни дополнителни испитувања за да се открие дали сулфорафанот може сигурно да ги намали психозите или халуцинациите кај луѓето со шизофренија. Би требало да се одреди и оптимална доза, како и времетраењето на третманот со следење на долгорочните ефекти на терапијата со сулфорафан.
„Можно е идните студии да покажат дека сулфорафанот е делотворен во спречувањето на развојот на шизофренија, односно во спречување на нејзините симптоми“, рекол Акира Сава, директор на Центарот за шизофренија во болницата „Џон Хопкинс“. Сулфораманот го има во разни видови овошја и прв пат е идентификуван како хемопротективна супстанца пред неколку децении. Според Светската здравствена организација, од шизофренија боледува околу 21 милион луѓе ширум светот.