Научниците од Универзитетот во Лестер анализирале податоци на речиси половина милион луѓе на просечна возраст од околу 52 години и откриле дека жените кои брзо одат имаат животен век во просек меѓу 86,7 и 87,8 години, а мажите кои брзо одат меѓу 85,2 и 86,8 години. Луѓето кои одат побавно имаат многу покус животен век – 72,4 години за жените и 64,8 за мажите.
Судејќи според податоците на научниците брзото одење влијае на животниот век дури и ако луѓето кои одат брзо се дебели. Сепак, стручњаците додаваат дека не можат да тврдат дека луѓето кои одат побрзо ќе живеат подолго – истакнуваат дека ја докажале врската меѓу овие две работи, но не можат да утврдат дали таа врска е баш причинско – последична. Ова, секако, не е прва студија со која се тврди дека брзото одење е добро за здравјето.
И истражување од 2011 година го покажало истото – брзината со која личноста оди може да ја „предвиди“ должината на животниот век. Исто така, и истражување од 2013 покажало дека брзото одење е поврзано со нискиот ризик од срцеви болести и подолг животен век. А студија од 2018 сугерира дека благото забрзување на одот до „просечна брзина“ може да го намали ризикот од рана смрт за една петина.
Професорот Том Јејтс кој ја водел најновата студија во некои претходни истражувања открил дека брзото одење може да влијае на ризикот од смрт како резултат на срцеви болести, заклучувајќи дека на тој ризик двојно повеќе се изложени оние кои бавно одат.
„Нашите резултати можат да помогнат да се истакне влијанието на физичките активности без оглед на телесната тежина, на животниот век на личноста,“ заклучил доктор Јејтс.
