Повеќето пушачи немаат претстава за тоа дека заради своите лоши навики можат да го загубат видот. Научниците предупредуваат дека чадот од цигарите предизвикува бројни очни болести и дека единствен лек е да се откажете од нив.
„Милиони луѓе ширум светот ги ризикуваат своите животи пушејќи, но и покрај една јасна врска само една од пет личности ја препознава информацијата дека пушењето може да доведе до слепило“, се наведува во анкетата на Асоцијацијата на оптичарите.
Пушачите имаат двојно поголем ризик да го загубат видот во споредба со непушачите, наведуваат стручњаците. Така е затоа што чадот може да предизвика и влоши бројни очни болести.
Чадот од цигари содржи токсични хемикалии кои можат да ги иритираат и оштетат очите. На пример, тешките метали, како што се оловото и бакарот, можат да се наталожат во очната леќа и да доведат до катаракта или сива мрена кога леќата станува замаглена. Пушењето, исто така, може да ги влоши проблемите поврзани со дијабетесот, заради оштетувањата во задниот дел од окото, односно мрежницата. Поради ова, пушачите имаат три пати поголеми шанси да развијат макуларна дегенерација – состојба која влијае на централниот вид, што значи дека ја губат способноста да гледаат ситни детали.
Покрај тоа, имаат и 16 пати поголема веројатност од непушачите за ненадејно губење на видот поради оптичка невропатија – кога се блокираат крвните садови кои го хранат окото.
Во анкетата на Асоцијацијата на оптичари во која учествувале 2 006 возрасни, 18 отсто од испитаниците изјавиле дека пушењето го зголемува ризикот од слепило или губење на видот, додека три четвртини, 76 отсто од нив знаат дека пушењето е поврзано со рак.
Асоцијациите на оптичари велат дека оставањето на цигарите или одбегнувањето на пушењето е еден од најдобрите чекори кои можете да ги преземете за да го заштитите видот.
„Луѓето знаат за врската меѓу пушењето и ракот, но многу луѓе не се свесни за влијанието на пушењето врз очите. Пушењето го зголемува риизкот од загрозување на видот, како што е макуларна дегенерација која инаку е поврзана со стареењето, што е важна причина зошто пушачите би требало да размислат да ги остават цигарите“, вели Ајшах Фазлани, оптичар и советник за клинички и регулаторни прашања од оваа област.
