Аносмијата е состојба на губење на осетот за мирис, невидлив хендикеп со кој е тешко психички да се живее и за кој нема вистински лек.
Се поголем број на пациенти заразени со новиот коронавирус страдаат од аносмија, а некои од нив се соочуваат и со долготрајно губење на ова сетило.
“Аносмијата ти одзема се што мириса во животот, а тоа е големо мачење“, вели Маилард, претседател на француското здружение кое нуди поддршка за заболените со овој проблем.
Таквата дијагноза, вели Маилард, ве оневозможува да го вдишете мирисот на свежо утринско кафе, свежо искосена трева или мирисот на сапун на вашата кожа. Тој со оваа состојба се соочува откако настрадал во несреќа и додава дека за важноста на сетилото за мирис стануваш откако ќе го изгубиш.
Лицата со аносмија не можат да реагираат на опасност, не можат да почувствуваат мирис на чад, течење на плин или неизмиена канта за отпадоци. За нив, и консумирањето храна е сосема поинакво искуство, оти не можат да го почувствуваат мирисот на она кое најмногу сакаат да го јадат.
“Носни полипи, хроничен ринитис, Алцхајмерова или Паркинсонова болест се само некои од причините за аносмија, а сега на истиот список е впишана и болеста КОВИД-19“, вели д-р Алаин Коре, оториноларинголог во болницата Ротшилд во Париз.
Нема специфична терапија за лекување на аносмијата. Треба, вели д-р Коре да се пронајде причината, и додава дека “проблемот кај аносмијата поврзана со коронавирусот е што лекувањето на вирусната инфекција најчесто нема влијание на враќањето на сетилото за мирис“.
“Првите податоци покажуваат дека околу 80% од пациентите со КОВИД-19 се опоравуваат за помалку од еден месец, а често и побрзо – за осум до 10 дена. Кај останатите оваа болест може да им ги уништи сетилните неврони кои ги детектираат мирисите, но добра вест е дека тие може да се регенираат“, објаснува специјалистот.
Тој вели дека засега во праксата се користени два типа на лекување на оваа состојба кај пациентите со КОВИД-19, со кортизон и со повторно учење на мирисите, и засега и двата даваат задоволителни резултати, ако се земе предвид дека огромен број на болни, но и опоравени лица од новиот коронавирус, бараат стручна помош за надминување на аносмијата.
