Кнедла во грлото (Globus histerycus), со прост, народски говор може да се дефинира како сопствено чувство на присуство на некоја „кнедла“, односно „топче“ во грлото кое оневозможува поминување на плунката и воздухот кој се вдишува. Она што е посебно интересно во студиите кои се бавеле со оваа проблематика е фактот дека е докажано оти значително почесто се јавува кај жените. Обично станува збор за жени, но и мажи, кои се повеќе изложени на стресови и напнати ситуации, па заради тоа се и понервозни. Ова чувство во најголем број случаи не се јавува осамено, туку заедно со него се појавуваат најчесто и трепкање, поткашлување, појава на нервоза од апсолутно мирна ситуација, па дури и беспричинско забрзување на работата на срцето, како и „глад за воздух“.
За жал, во голем број случаи на таквата личност и е нарушено и психичкото здравје, па заради тоа се јавуваат и анксиозност (разни видови стравови, на пример: дека ќе се задуши, ќе умре, дека е болна од неизлечива болест и сл.), како и депресија (потиштеност, губиток на интерес за вообичаени активности итн.).
Со сето ова се јавува и напад на паника кој навистина може да наликува на некој облик на гушење или срцев напад, што најмногу ги плаши блиските. По доаѓањето или одењето од лекар тегобите исчезнуваат, но повторно се јавуваат кога личноста ќе се „осами“, на пример, кога ќе легне да спие. Мошне интересно е дека чувство на кнедла во грлото се губи брзо по пиење, јадење. Значи, се јавува само „на суво“ кога личноста голта плунка. Во медицината овој симптом најчесто се смета за безопасен, затоа што не е поврзан со ниту едно органско заболување.
Значи, во прашање е неорганска психичка состојба во која доаѓа до зголемена затегнатост на мускулите на вратот (како последица на стрес, напнатост и нервоза) што и го создава тоа чувство на „кнедла“. Меѓутоа мускулите на вратот НИКОГАШ не можат толку да се затегнат за навистина да го спречат поминувањето на плунката и воздухот. Проблемот настанува дури кога „кнедлата“ ќе се здружи со претходно наведените состојки затоа што тогаш мора да се појде на лекар, психијатар и психолог. Доколку личноста е психички јака и не размислува за „кнедлата“, таа брзо исчезнува. Нашиот народ има убаво објаснување како настанува оваа состојба – НА НЕРВНА БАЗА!
На личноста со ваква тегоба и се советува преглед од страна на матичниот лекар, потоа: ендокринолог и радиолог (со снимање со бариум и ултразвук во пределот на вратот може да се види протокот на воздух и плунка, како и состојбата на крвните садови во вратната регија).
Кога дефинитивно ќе се исклучат органските причини кои, веќе напоменавме, НЕ ПОСТОЈАТ, пациентот се упатува на психијатар и психолог на понатамошни прегледи, консултации и лекување.
Неколку практични совети за ублажување и исчезнување на „кнедлата“:
- Секогаш со себе или покрај себе имајте шишенце со течност и испијте неколку голтки штом почне дека се јавува чувството;
- Доколку не помогне претходниот совет, предизвикајте зголемено зачење на плунка со лижење бонбона, лимон, џвакање гума за џвакање…
- Обавезно направете прегледи кај матичниот лекар, ендокринолог и радиолог, евентуално појдете и на понатамошо испитување кај психијатар и психолог;
- Лекувајте ги анксиозноста или депресијата, ако постојат;
- Намалете го стресот колку што е можно;
- Вдишувајте на уста и издишувајте на нос, односно така дишете без оглед колку ви е тешко затоа што на тој начин се намалува можноста за појава на паника и други ситуации кои можат да се надоврзат на веќе постоечката состојба;
- Најдобра е автосугестијата, односно личноста да се обиде да се убеди самата себеси дека таа „кнедла“ не постои, туку дека „мозокот си игра со телото“ и „кнедлата“ НАВИСТИНА ЌЕ ИСЧЕЗНЕ!
