Вообичаено е забите од горната и долната вилица да доаѓаат во контакт додека јадеме. Меѓутоа некои луѓе кога се под стрес, несвесно почнуваат да ја стегаат вилицата и да чкрипат со забите. Оваа лоша навика се нарекува бруксизам и може сериозно да ги оштети забите.
Додека личноста се обидува да се исконтролира во стресна ситуација, ја движи вилицата напред – назад или лево-десно и чкрипи со забите. Некогаш оваа состојба може да биде минлива, а и најчесто исчезнува сама од себе. Интересно е дека некој луѓе чкрипат со забите само навечер, и тоа е т.н. ноќен бруксизам. Освен звучни ефекти што се произведуваат, во текот на утринските часови може да се појави и болка во вилицата.
Инаку, освен што оваа појава може да им пречи на другите околу вас, може да имате и сериозни последици по забите. Забите се трошат, рамнат и можат да станат чувствителни, па дури и да се скршат. А освен болка во вилицата може да се јави болка и во пределот на слепоочницата како и вратот, па затоа е важно навреме да се побара помош од стоматолог.
