Летото не може да се замисли без капење во базени и езера, а таму покрај купот капачи ве „чекаат“ и многу вируси, бактерии, габи и други микроорганизми кои предизвикуваат непријатности, а често и опасни инфекции. Затоа бидете внимателни!
Кои се најчестите инфекции кои се закануваат?
Атлетско стапало
Главен виновник е габата кандида, која под дејство на влага и топлина брзо се шири. Се препознава по чешање, црвенило, испукана кожа меѓу ножните прсти, бели лушпички и ситни пликови по кожата. А лесно се пренесува на останатите делови од телото. Инфицираните нокти се задебелени, имаат кафеава боја или бели дамки и непријатен мирис. Инфекцијата долго се лекува.
Конјунктивитис
Оваа инфекција на очите најчесто е предзивикана од вируси и бактерии, кои се пренесуваат преку вода, со валкани раце или пешкири. Се препознава по црвенило и отоци на капаците, боцкање, печење или чешање на очите, како и по жолтеникавиот секрет кој ги прекрива трепките.
Дијареја
Водата е полна со бактерии, па доволно е да голтнете само малку загадена вода и да се инфицирате со салмонела, шигела или ешерихија коли кои предизвикиваат дијареја, грчеви, силни болки во стомакот и висока температура.
Вирусни брадавици
Брадавиците најчесто ги предизвикува хуман папилома вирусот кој долго опстојува надвор од телото. Инкубацијата трае и до шест месцеи, па така кај пациентите првите израстоци се појавуваат во текот на есента или зимата.
Инфекции на кожа
Заради засилено потење, изложување на сонце, носење тесна облека или маици од синтетика, по кожата се појавуваат црвени мозолчиња кои пукаат. Иритираната кожа во контакт со бактериите може да резултира со инфекција која бара лекување.
Вагинални инфекции
Кандидата е нормален жител на дебелото црево и под влијание на влага и топлина брзо се размножува, на ова му оди во прилог седењето по плочки на базените, влажен пешкир, влажниот костим за капење и несоодветната хигиена. Симптомите се печење и чешање во пределот на гениталиите, како и густ, бел секрет со непријатен мирис. На базен може да „закачите“ и бактериска инфекција предизвикана од кламидија, микоплазма и уреаплазма, но вирусен херпес или ХПВ кој предизвикува кондиломи. Иако овие инфекции главно се пренесуваат по сексуален пат може да се добијат и преку влажен пешкир.
Воспаление на уши
Инфекцијата на надворешниот ушен канал спаѓа меѓу најчестите летни тегоби и превенствено се јавува кај децата и возрасните кои дошле во контакт со загадена вода. Во најголем број случаи воспалението на увото го предизвикуваат бактерии, а симптомите се силна болка, запушеност, зголемена температура. Не го чистете увото со стапчиња, за да не ја пренесете инфекцијата во внатрешниот канал. Појдете на лекар.
КАКО ДА СЕ ЗАШТИТИТЕ?
- По плочките околу базенот одете во влечки.
- Не седете по работ од базенот.
- Не голтајте вода.
- Не нуркајте со отворени очи, без маска.
- Не уринирајте во водата и добро мијте ги рацете по пливањето.
- По излегувањето од вода задолжително туширајте се и измијте го лицето со чиста вода.
- Секогаш седете на чисти и суви пешкири.
- Не седете во мокар костим за капење затоа што влагата и топлината поттикнуваат размножување на бактерии.
- Кога ќе се вратите од базен обавезно убаво истуширајте се со сапун и вода.
- По туширањето внимателно избришете го целото тело, а особено препоните, пазувите и ножните прсти.
