Повеќе од три четвртини од лицата хоспитализирани од КОВИД-19 и натаму страдаат најмалку од еден симптом по шест месеци, се наведува во студијата објавена во медицинското списание The Lancet.
Истражувањето вклучувало стотина пациенти од кинескиот град Вухан, а се вбројува меѓу едно од ретките истражувања кое влегло во трага на долготрајните симптоми на инфекцијата што ја предизвикува вирусот SARS-CoV-2.
Откриено е дека заморот или слабоста на мускулите се најчестите симптоми на оваа болест, а пациентите над кои се спроведувало истражувањето информирале и за потешкотии со спиењето.
“Со оглед дека КОВИД-19 е нова болест, сега почнуваме да сфаќаме некои од нејзините долгорочни ефекти на здравјето на пациентите“, вели проф. Бин Чао од Националниот центар за респираторна медицина, кој е еден од истражувачите.
ТРАЈНА НЕГА
Тој додава дека истражувањето ја нагласило потребата за трајна нега за пациентите по отпуштање од болница, особено на оние кои имале сериозни инфекции.
Светската здравствена организација истакнува дека вирусот претставува ризик од сериозни, трајни последици и меѓу младите, кои не биле хоспитализирани.
Студијата открила дека 76 проценти од пациентите рекле дека се уште имаат симптоми. Замор или слабост на мускулите пријавиле 63 проценти, додека 26 проценти имале проблеми со спиењето.
АНТИТЕЛА
Студијата исто така проучила 94 пациенти, чие ниво на антитела во крвта бил во пикот на инфекцијата, како дел од второто испитување. Кога тие пациенти повторно биле тестирани по шест месеци, нивото на неутрализирачки антитела им било 52,5% пониско.
Истражувачите велат дека добиените податоци предизвикуваат загриженост поради можните повторни инфекции со коронавирус, но напоменуват дека за разрешувањето како имунитетот на вирусот се менува со тек на времето, ќе бидат потребни опсежни и поголеми примероци.
