Пишува: Д-р Елизабета Бабушку
Радиодијагностичар-субспецијалист по мама дијагностика
Кога се прави самопрегледот
- Два дена по завршување на менструалното крвавење, при редовен менструален циклус
- Оние кои земаат контрацепциски таблети прегледот треба да го направат со првата таблета од новата кутија
- Ако жената е во менопауза прегледот треба да се прави секој месец на ист датум
Како се прави самопрегледот
Застанете пред доволно големо огледало и набљудувајте ги дојките во неколку позиции:
♦♦♦ Со рацете спуштени покрај телото
♦♦♦ Со дланките потпрени на колковите
♦♦♦ Со рацете кренати над глава
♦♦♦ Со рамената зафрлени наназад
♦♦♦ Легнете на грб и ставете перница под едното рамо. Раката од страната под која е перницата подигнете ја и ставете ја под главата
♦♦♦Со јагодиците на показалецот, средниот и домалиот прст на слободната рака изведувајте кружни движења, со различен притисок, во зависност од тоа дали прегледувате површни или длабоки структури на дојката
♦♦♦Притисокот на прстите треба да е приспособен да може да се почувствува и запознае структурата на дојката
♦♦♦ Проверувајте и со движења горе-долу или со движења кон и од брадавицата
♦♦♦ Направете го истиот самопреглед и на другата дојка
♦♦♦ Истата техника применете ја и во положба на стоење
Доколку забележите каква било промена веднаш појдете на лекар
Десет причини за мамографија
Мамографијата е рендгенска метода која користи ниска доза на Х-зраци и е златен стандард во раното откривање на ракот на дојка и други патолошки промени во неа.
- Не секогаш можете да ја почувствувате грутката во дојката. Мамографот овозможува да се детектира грутка до две години пред да може да се почувствува на допир
- Раната дијагноза на ракот на дојка значи и поголема шанса за излекување
- Мамографијата е брза процедура која не одзема повеќе од 20 минути
- Прегледот е безболен и не предизвикува неудобност
- Иако повеќето жени сметаат дека Х-зраците се потенцијални предизвикувачи на рак, современите апарати за мамографија овозможуваат безбеден преглед, без несакани ефекти
- Мамографијата е препорачана дијагностичка процедура за жени со фамилијарна историја на рак на дојка (мајка, баба, сестра, тетка), односно за жени кои се носители на мутиран ген БРЦА1/БРЦА2
- Мамографскиот преглед треба да го направат и сите жени кои примале или примаат хормонска терапија во лекување на стерилитет и слични гинеколошки заболувања
- Возраста влијае на инциденцата за појава на рак на дојка. Според тоа, првиот мамографски преглед секоја жена треба да го направи помеѓу 35-та и 40-та година од животот, на секои две години. Прегледот треба да се прави и кај жени кои не чувствуваат никакви симптоми
- Студиите покажале дека мамографскиот преглед е единствен досегашен метод за рано откривање на рак на дојка кој може да спаси живот
- Бидете пример. Доколку правите редовни мамографски прегледи, жените околу вас ќе се охрабрат да го сторат истото.
