Кога темата е раното развивање на детското стапало најбитно е движењето. Многу малку од деформитетите на стапалото се вродени, најголем дел се стекнати поради неактивност, лоши навики и обувки. Зимскиот период и ладното време, понекогаш и загадениот воздух, во некои градови не тераат да се затвориме дома и да не се движиме доволно.
Децата мора да имаат секојдневна активност во отворен безбеден простор каде можат да трчаат притоа да не бидат држени за рака. Не е доволно одењето по дома. Најбитна фаза од детското чекорење во првите неколку години е одењето на прсти, токму тоа одење на прсти ги поправа сите стекнати деформитети на мрзливото стапало.
Во таа насока, особено во зимските периоди една од најбитните работи покрај активноста е и обувката. Таа мора да биде флексибилна во пределот на детските прстиња. Секогаш кога купувате обувка проверете го тоа.
Родители! До десетгодишна возраст на вашите деца морате вие да им ги земете и рачно да им ги разгазите обувките во пределот на прстите, децата немаат доволно сила и тежина тоа сами да го направат, а крутата обувка ќе го направи да оди како робот на цело стапало, наместо најбитното – да оди на прсти.
Зимските обувки се најчесто многу крути и ако вашето дете само што проодело не верувам дека секој ден ќе оди по снег. Затоа за сите родители, особено во загадените градови кои најголем дел од времето шетаат по трговски центри, нека го стават детото во есенско патиче не во зимска чизма, а за инцидентно одење по снег ќе заврши работа некоја поставена гумена чизма.
Уште две правила кои важат цела година, а не само во зимата, ама морам да ги напоменам во врска со обувките се големината и типот на обувката.
Кај дете во првите до 4 години возраст обувката треба да биде 1 см поголема од должината на стапалото кога ја купувате. Стапалото на детето расте многу брзо, затоа дете носи обувка отприлика 1 месец, но тоа може да трае и пократко. Многу е битно еднаш на две недели да проверувате дали пораснало стапалото на детето, а тоа најдобро ќе го направите ако ја извадите влошката од обувката и ја споредите со стапалото, не може да одредите дали е точна обувката со пипкање на палецот затоа што децата кога стојат ги собираат прстињата. Што се однесува до типот на обувката, таа треба да биде анатомска, а не ортопедска. Ортопедски обувки се купуваат за деца кај што ортопедот ќе нагласи дека детето има потреба од таква обувка за корекција на деформитет и таа обувка се изработува по мерка од специјализирани ортопедски производители на помагала. Значи, здраво дете не треба да носи такви обувки, “ортопедски обувки” не треба да се купуваат на своја рака во обични продавници, без препорака од ортопед. Анатомските обувки го следат стапалото, а тоа во првите неколку години е физиолошки рамно, со самото одење на прсти и активност се формира лакот во средишниот дел од внатрешната страна на стапалото.
Дома децата треба да одат боси или во чорапчиња со гумички на долниот дел. Не обувки по дома! Најдобра е таа обувка што му овозможува на стапалото да се движи како да е босо, затоа се нарекува анатомска затоа што ја следи анатомијата на босото стапало.
