Со скромни чекори, но огромна посветеност, пред 55 години во Тетовската болница почнала да функционира хирургијата. Благодарение на д-р Рефет Ферати, 1963 година прв пат се отвора ортопедскиот оддел на болницата, да за кусо време профункционира и одделот за урологија, па за општа хирургија и максилофацијалната хирургија. Денес, 55 години подоцна тетовската хирургија може нескромно да се пофали со примена на најсовремени методи и техники на згрижување на пациентите.
„На овој значаен јубилеј, би сакал да им се заблагодарам на сите лекари, медицински персонал за несебичниот ангажман и посветеност во развојот и унапредувањето на хирургијата. Она на кое сум особено горд е довербата која ја градиме со пациентите и можноста секогаш да им бидеме на услуга кога им е потребно“, истакна на свеченоста по повод одбележувањето на јубилејот 55 години од тетовската хирургија, д-р Илбер Бесими, раководител на Одделот за општа хирургија и трауматологија.
Во оваа пригода, д-р Бесими им се заблагоради пред се на медиумите за поддршката и помошта во промоцијата на тетовската хирургија. Истовремено, плакети им беа доделени и на неколкумина пензионирани медицински работници, дел од тетовската хирургија, како и на лекари кои се уште работат и функционираат во тетовското здравство. Плакети во знак на благодарност добија и Македонски здруженија на лекари, болници и фармацевтски компании.
