Пишува: Д-р Лилјана Брајевиќ
Специјалист по општа хирургија
Постојат повеќе бенигни промени на кожата, но најчести се липоми, атероми, бемки, кератози. Што можат тие да предизвикаат и како се третираат?
Бенигните промени на кожата се многу чести и речиси и да нема човек без некаква промена на кожата. Кај поголемиот дел од оние кои ќе воочат промени на својата кожа реакциите се загрижувачки и не вознемируваат, и секогаш се поставува прашањето што треба хируршки да се отстрани, а што не. Лекарите велат дека сите промени на кожата не треба да се оперираат. Постојат повеќе бенигни промени на кожата, но најчести се липоми, атероми, бенки, кератози.
♦♦♦ ЛИПОМИ ♦♦♦
Липом е бениген тумор кој е изграден од масно ткиво. На допир обично е мек, со мазна површина и еластичен, локализиран под кожата или мускулите на различни делови од телото. Понекогаш кај некои пациенти се јавуваат и повеќе од 20 липоми и таквата состојба се нарекува липоматоза. Малите липоми не прават некаква непријатност, освен што понекогаш естетски му пречат на пациентот. Препораката е хируршки да се отстранат, бидејќи понекогаш промена која расте постојано со текот на годините може да премине во малигна варијанта.
♦♦♦ АТЕРОМИ ♦♦♦
Атером е дермална циста на кожата која се јавува како резултат на оклудирана лојна жлезда. На допир атеромите обично се посолидни од липомите. Најчесто се јавуваат на главата, вратот и нагрбот. Атеромите може со години да постојат без да прават никаков проблем, освен понекогаш од нив да се исцеди секрет. Препораката е атеромите да се отстранат хируршки, бидејќи може да се воспалат. Во случај на воспаление, кај пациентот се јавува болка и црвенило. Хируршкиот третман се состои во комплетно отстранување на атеромот заедно со капсулата.
♦♦♦ НЕВУСИ ♦♦♦
Невуси се бенигни промени на кожата кои може да се со различна форма, најчесто кафеави или црни, со дијаметар од 5 до 20 милиметри. Некои од промените постојат од самото раѓање, а некои се јавуваат во текот на животот. Секој човек кој има повеќе од 50 невуси на кожата треба на секои 6 месеци да оди на редовни дерматоскопски прегледи кај дерматолог. Хируршки треба да се отстранат оние бенки кои ја менуваат формата, големината, бојата, кај кои се јавува чешање, болка и крвавење. Исто така, промените кои постојано се иритираат треба да се отстранат. По хируршкото отстранување препаратот задолжително се праќа на патохистолошка анализа.
♦♦♦ ДЕРМАТОФИБРОМИ, КEРАТОЗА И ПАПИЛОМИ ♦♦♦
Дерматофибромите се солидни, безболни и соразлична големина промени на кожата. Може да се јават на секој дел од телото, а најчесто на нозете. Кератоза е промена на кожата со кафеава боја, различна по големина, понекогаш поголема и од 3 сантиметри. Најчесто се појавува на деловите на телото изложени на сонце, а најчести се кај повозрасни лица. Папиломи се мали бенигни промени на кожата или мукозата. Понекогаш може да се предизвикани од вируси. Најчесто се мултипни, на петелка, и се јавуваат на вратот, под градите и на стомакот.
♦♦♦ ХИРУРШКИ ТРЕТМАН ♦♦♦
Бенигните промени на кожата се оперираат во локална анестезија. Процедурата, трае околу 15 минути, по што пациентот може да продолжи со секојдневните активности. Кај пациенти со повеќе невуси по кожата, прво се препорачува дерматоскопски преглед кај дерматолог, па по негова препорака се отстрануваат.
