Пишува: Д-р Лилјана Тевдовска
Интернист
Ултразвучниот преглед на стомакот (ЕХО на абдомен) е дијагностичка метода која се прави и кај возрасни, како и кај деца, и има за цел прикажување на структурата на различните органи во стомашната шуплина. Класичниот ултразвучен преглед нуди детален увид во големината и структурата на црниот дроб, слезената, панкреасот, жолчното ќесе и патишта, бубрезите, надбубрежните жлезди. Со оваа метода исто така може да се согледа стомачниот дел на аортата, бешиката и простата кај мажите.
Благодарение на едноставноста и нештетеноста на изведување на прегледот, ултразвукот претставува сигурна и ефикасна метода во откривање и следење на различни заболувања на абдоминалните органи.
БОЛКА ВО СТОМАКОТ
Со ултразвучен преглед на сите органи во стомакот докторот ги проверува претпоставките за можните причини за болката на која се жали пациентот, особено кога таа е со општи и нејасни симптоми.
ВНАТРЕШНО КРВАВЕЊЕ
Повредите при кои доаѓа довнатрешно крвавење опасно по живот многу често не се видливи веднаш, па затоа прегледот со ултразвук е многу корисно скенирање за утврдување на обемот на крвавење и причината за него.
ПОЈАВА НА ТУМОРИ, ЦИСТИ…
Со ултразвучен преглед можат да се откријат тумори, цисти, абсцеси, акцесорни органи, сврзноткивни лузни, секој со свои типични карактеристики, па докторот може да даде и прецизно мислење.
БОЛЕСТИ НА ЦРНИОТ ДРОБ
Со ехо-преглед може да се направи разлика меѓу разните типови заболувања на црниот дроб. Особено важна улога има при откривањето на примарните и метастатските тумори на црниот дроб, состојби на опструкција на жолчните патишта и следење на состојбата кај цироза на црниот дроб.
БОЛЕСТИ НА ПАНКРЕАСОТ
Со ултразвук се откриваат панкреатични тумори, воспалителни заболувања на панкреасот како акутен панкреатитис, калкули, калцификати и псеудоцисти кај пациенти со хроничен панкреатитис.
ЗАБОЛУВАЊА НА ЖОЛЧНОТО ЌЕСЕ
Жолчните камчиња прават воспаление на жолчното ќесе, опструкција на жолчните канали и прекин на доток на жолчен сок и дигестивни ензими од црниот дроб во цревата, а пациентот има болка под десниот ребрен лак и не поднесува масна храна. Во овие случаипрегледот со ултразвук е суверена метода.
БОЛЕСТИ НА СЛЕЗЕНКАТА И НА БУБРЕЗИТЕ
Слезенката често страда при стомачни трауми, од воспаленија и од малигни заболувања. Во бубрезите често се создаваат камчиња кои можат да го нарушат целиот уринарен систем. Ултразвукот се покажа како исклучително корисна техника во дијагностиката на овие состојби.
ЛЕКУВАЊЕ НА АНЕВРИЗМА
Аневризмата е опасно по живот проширување, истенчување и ослабување на ѕидот на абдоменот. Со редовни ехо-прегледи може да се спречат акутните компликации, како руптура, и да придонесе за навремено хируршко лекување.
