Пишува: Д-р Сузана Мијовска
Специјалист интернист
Абдоминалната шуплина е дел од телото која се протега од дијафрагмата, под градниот кош, до препоните. Во неа се сместени абдоминалните органи и според нивната локализација се одредува и патолошката состојба на органот која ја предизвикува. Во неа се сместени желудникот, црниот дроб, жолчката, панкреасот, слезенката, обата бубрега, мочниот меур, матката и јајчниците кај жените и простатата кај мажите. Низ целата површина се протегаат тенкото и дебелото црево. Тука се наоѓаат и крвните садови (вени и артерии), абдоминалната аорта, лимфни јазли, нерви. Болката во абдоменот е еден од најчестите симптоми поради кој пациентите се јавуваат на лекар. Без разлика дали се работи за повремена или постојана, нелагодна или интензивна, тапа или остра, болката секогаш е причина за доиследување на состојбата и нејзино лекување. Ова не е необична здравствена состојба и речиси секој човек барем еднаш во животот ја има искусено. Д-р Сузана Мијовска, спец. интернист појаснува дека со оглед на тоа дека абдоменот зафаќа голем дел од телото, потребно е да се лоцира точното место на болката за да може полесно да се открие причината.
- Гастрит и жиговина
Предизвикан од неправилна исхрана, бактерија хеликобактер пилори, која создава болка во горниот дел на стомакот проследена со мачнина, повраќање, надуеност, губење на апетит и жиговина. Доколку болката се шири кон градната коска и градниот кош, треба да се исклучи можноста од акутен миокарден инфаркт.
- Болка во панкреасот
Предизвикана од воспаление на панкреасот, а се манифестира со појасна болка во горниот дел од стомакот, потенцирана централно над папокот, мачнина и нагон за повраќање.
- Чир на желудникот
Предизвикан од стрес, алкохол, лекови против болка и бактерија, а се манифестира со појава на болка во горниот дел од стомакот при консумирањето храна. Доколку има нагони за гадење и повраќање, а во повратената маса има и присуство на крв која е темна, тогаш треба веднаш да се побара лекарска помош.
- Нервозно дебело црево
Причините се непознати, но настанува по внесување на храната, а се манифестира со непријатно чувство во стомакот, подуеност, гасови, грчеви, опстипација или дијареја.
- Стомачен вирус
Предизвикан од ротавирус или бактерија, а се манифестира со течни столици, грчеви, мачнина и абдоминална болка во вид на колика.
- Труење со храна
Предизвикано од бактерија, вируси и паразити во храната, а се манифестира со дијареја, мачнина или повраќање.
- Интолеранција на лактоза
Предизвикана од недостаток на ензимот лактаза, а се манифестира со дијареја, гасови, подуеност и стомачна болка.
- Алергија на храна
Предизвикана од одбранбена реакција на организамот кон одреден вид храна, а се манифестира со стомачна болка, отекнување на грлото и устата.
- Апендицит
Предизвикан од воспаление на слепото црево, а се манифестира со долготрајна дифузна болка во стомакот која потоа се потенцира околу папокот и десно кон препонската регија, проследена со мачнина, повраќање и намален апетит. Честопати е проследена и со кочење на десната нога. Ваквата состојба е итна и треба веднаш да се побара лекарска помош.
- Воспаление на жолчка
Предизвикано од жолчни камења кои ја блокираат функционалноста на жолчката, а се манифестира со остра стомачна болка која може да трае со часови. Особено потенцирана по масна и обилна храна. Оваа состојба, исто така, треба веднаш да се пријави на лекар.
- Кила
Предизвикана од свтикување или поместување на дел од цревата низ абдоминалниот ѕид, а се манифестира со остра болка во стомакот, чувство на непријатност при одење и седење, често надување на стомакот кое се повлекува во лежечка положба. Доколку подуеноста не се повлекува во лежечка положба, веднаш треба да се оди на лекар.
- Опстипација
Предизвикана од недоволно внесување на хранливи влакна и течности, а се манифестира со тврд измет или неможност за редовно и целосно слободно празнење на цревата, подуеност и стомачна болка.
- Дивертикулитис
Предизвикан од консумирање зрнеста храна, црвено месо, бактерии, а се манифестира со постојана стомачна болка која трае долго, дијареја, грчеви, подуеност, гасови, треска, опстипација.
- Бубрежна болка
Предизвикана од бактериска инфекција и/или песок или камчиња во бубрегот, кои при поголем физички напор се придвижуваат и предизвикуваат силна, прободувачка болка во десниот или левиот слабински предел, која се протега нанапред и надолу кон мочниот меур, честопати проследена со воспаление на мочниот меур, кое се манифестира со зачестено мокрење и печење при мокрење.
Секој орган од горенаведените може да биде причина за појава на болка која воопштено се разликува од орган до орган, а може да биде различна по интензитет, времетраење и вид.
Според клиничката слика која не се состои секогаш само од еден симптом, се проценуваат и итноста и начинот на лекување.
За да се добие целосна слика за болеста и да се воспостави точната дијагноза, освен клиничкиот преглед на пациентот се вршат и дополнителни иследувања (крвна слика, ултразвучен преглед на абдоменот, компјутеризирана томографија).
Од голема важност е да обратите внимание на симптомите кои ги чувствувате, што овозможува полесно да се детектира причината за болката во абдоменот. На тој начин вашиот лекар најдобро и најбрзо ќе открие за кој орган станува збор и каков третман ви е потребен за негово лекување, медикаментозен или оперативен.
