Пишуваат:
Д-р сци. Александар Сајковски, педијатар и доц. д-р Катарина Ставриќ, имунолог- педијатар
Дали модерните адаптирани млека се исти како мајчиното млеко? Треба ли мајката пред секој подој да ги измие брадавките и дали ако има инфекција или прима лекови треба да прекине со доењето? Д-р сци. Сајковски и доц. д-р Ставриќ даваат одговор на овие и други прашања и заблуди поврзани со доењето.
НЕКОИ ЗАБЛУДИ ПОВРЗАНИ СО ДОЕЊЕТО
- Бебето треба да се дои по 20 минути на секоја града. Нема правило за времетраењето на подојот. Треба да се прави разлика меѓу доење и бебе кое е на града. Тоа е индивидуално за секое бебе.
- На бебе кое цица му треба дополнително вода. Напротив, бебето со цицање ги задоволува своите потреби за вода така што нема потреба од дополнително внесување.
- Пред секој подој мајката треба да ги измие брадавките. Самото млеко содржи материи кои го штитат бебето од инфекција, така што нема потреба пред секој подој да се мијат брадавките. Со често миење се отстранува заштитниот слој на маснотии на кожата и се олеснува продорот на бактерии.
- Мајчиното млеко не содржи доволно количество на железо. Правилната исхрана на мајката обезбедува доволно количество железо за првите 6 месеци на бебе кое е на доење.
- Полесно е бебето да се храни со шише отколку да се дои. Не е точно. Во почетокот доењето може да е поврзано со тешкотии, но тие лесно се надминуваат со поддршка од околината и подоцна доењето не преставува тешкотија за мајката.
- Модерните адаптирани млека се исти како мајчиното млеко. Адаптираните млека само го имитираат мајчиното млеко, но не можат да го заменат комплетно. Тие не содржат антитела, клетки кои учествуваат во одбрана на организмот од инфекции, фактори на растење, ензими. Адаптираните млека содржат повеќе алуминиум, манган, кадмиум и железо отколку мајчиното млеко. Протеините и мастите се разликуваат од оние во мајчиното млеко.
Постојат дневни промени во количеството на млекото (наутро – навечер), но не е можно ненадејно прекинување на млекото
- Ако мајката има инфекција треба да прекине со доењето. Со исклучок на ретки ситуации, мајката треба да продолжи со доење затоа што истовремено создава заштитни материи кои се излачуваат преку млекото и го штитат бебето од инфекција. Дури и ако бебето се разболи, тоа полесно ќе ја преброди инфекцијата доколку се дои.
- Ако мајката прима лекови треба да прекине со доење. Постојат мал број на лекови кои се пречка за доењето. Секогаш постои можност за замена на еден лек со друг кој не се излачува преку млекото, така што мајката да може да продолжи со доење.
- Мајчиното млеко може ненадејно да „секне”. Постојат дневни промени во количеството на млекото (наутро – навечер), но, не е можно ненадејно прекинување на млекото. Промени во продукцијата можат да се јават во одредени состојби како што се: зголемени потреби на бебето, промена на однесувањето на бебето околу 5-6 недела кога заспива при намален проток на млеко, мекост на градите, која нормално се појавува по неколку недели од почетокот на доењето, бебе кое е дохранувано со шише или користи цуцла лажалка.
- Бебе кое се дои често има стомачни колики.
- Мајка која прима вакцина треба да прекине со доењето во текот на 24 часа.
- Мајка која дои треба да јаде за двајца. Не е точно. Калориското внесување треба да се зголеми за 500 калории на ден за мајка која дои. Иако е докажано дека и мајки кои нормално јадат создаваат доволно количество и квалитет на млеко.
- Мајка која дои треба да пие многу вода. Напротив, таа треба да ја задоволи својата жед, но не да претера со внесување на течности.
- Мајка која пуши цигари не треба да дои.
- Мајка која имала операција на градите не може да дои.
- Мајка со мали гради создава малку млеко.
- Мајка која дои не смее да прима контрацепција. Хормонските таблети влијаат врз продукцијата на млекото, а во многу мало количество се излачуваат во млекото.
- На бебе кое се дои по 6. месец му треба друго млеко. Напротив, бебето може да се дои и до 2 години. Мајчиното млеко се приспособува на потребите на бебето кое расте и постојано се менува.
