Летниот одмор е еден од најубавите и највозбудливи периоди во животот на секое дете. Без оглед дали го поминувате на море, езеро или планина децата го доживуваат со посебен приод и страст. Но често истиот може да прерасне во непријатно искуство ако не сте соодветно подготвени, а земајќи ги предвид нашите навики, се опремуваме со прирачни аптеки со лекови кои ни требаат или некои кои воопшто нема да ни требаат. Но, иако треба да се надевате дека истите воопшто нема да ги користите, неопходно е пред патувањето со посета кај вашиот педијатар да се запознаете со сите можни состојби кои може да му се случат на вашето дете, а за лековите кои ги носите да се запознаете добро со препорачаните дози и индикации за нивна употреба.
Лекови за намалување на покачена телесна температура – антипиретици
Ибупруфен и/или парацетамол се лекови кои се ефикасни за намалување на покачената телесна температура со минимални несакани ефекти. Се користат кога температурата е поголема од 38.5 степени. Тоа се медикаменти кои добро делуваат и како лекови за смирување на болка (аналгетици).
Покрај сируп, треба да се понесат и супозитории (чепчиња) парацетамол. Тие се значајни при состојби на повраќање кога детето не може или тешко пие сируп. Но, не се даваат ако детето има пролив, затоа што може да го иритира цревото.
Капки за нос
Настинките се многу ретки во лето, но се можни особено ако одморот е на планина. Затнат нос или нешто пообилна секреција од нос се состојби кои крајно го иритираат детето, особено ако е во тек на првата година од животот. Тоа ја компромитира исхраната, пиењето на течности, а постои опасност од блокирање на комуникационите канали со увото и развој на воспаление на увото (отитис). Поради наведените причини, капките за нос се редовна компонента на патната аптека. Најчесто и најбезбедно е користење на физиолошки раствор или т.н. „солена вода“ како капки или спреј. Другите типови на капки (се мисли на класични медикаменти како капки) не се даваат подолго од 3-4 дена, поради нивните негативни ефекти на слузницата на носот. Ако детето е алергично на полен, трева или друга инхалативна компонента, а летувате на планина консултирајте се со Вашиот педијатар за користење на кортикостероидите спрејови за нос.
Капки за очи
Престојот на песок, контактот со песокот и/или валкани раце со окото често е причина за развој на акутен конјунктивитис. Овој тип на воспаление добро е да се третира со локални антибиотски капки како што е Тобрадекс или Цитерал.
Но често покрај антибиотските капки е потребно да се искористат и оние капки кои имаат антиинфламаторно дејство, а содржат и кортикостероид како што се капките Дексаметазон-Неомицин. Тие може да помогнат и да го смират и алергиското воспаление на конјунктивата, кое може да се јави некогаш при долготрајно нуркање со отворени очи, а без маска, но и како алергиска реакција на сонце. За оние деца кои имаат јасен и хроничен алергиски конјунктивит постојат и поспецифични кортикоидни или антихистамински капки за кои претходно треба да се консултирате со вашиот педијатар.
Лекови против повраќање – антиеметици
Повраќањето е сериозен симптом кој може да биде од голема важност кај децата. Тоа може да се јави како „патничко повраќање“ или како интоксикација со храна или во склоп на дијареален инфективен синдром. Во однос на патничкото повраќање најголемиот број на деца лесно и добро го поднесуваат патот до саканата дестинација без оглед дали се работи за превоз со кола или автобус. Сепак, кај одреден број од нив може да се јави мачнина во тек на превозот и крајно, повраќања кои можат значително да го компромитираат патувањето. Затоа пред да се започне патувањето треба да се направи се што е потребно за да се растовари стомакот на детето, односно внесување на лесен оброк пред патување со малку течности, а водата во тек на патувањето да се дава по принцип „често, а малку“. Ако оваа подготовка не е ефикасна, па и покрај истата кај детето се појави мачнина и повраќање, тогаш треба да се бара спас во употреба на таблети против повраќање.
Прототип во оваа група на лекови е Антиметил како стандардизиран екстракт од ѓумбир кој содржи 10 % гингероли, кои со прокинетичко дејство го забрзуваат празнењето на желудникот, а имаат дејство врз рецепторите на гастроинтестиналниот тракт (5ΗΤ3, Μ, ΝΚ), во хеморецепторната тригер зона (5ΗΤ3, Μ, ΝΚ) и внатрешното уво(Μ). Покажува брз ефект на дејство и ефикасност кој е еднаков на синтетичките антиеметични лекови како што се Domperidone, Cinnarizine, Dimenhydrinate и Meclozine. Пред патување консултирајте се со својот педијатар со оглед на фактот дека одредени хемиски антиеметични лекови се забранети кај децата.
(продоложува)
