Лекови за третман на алергија
Алергиите се чести во период на одмор. Некои алергиски реакции се бурни и бараат брз третман со препарати како што е Деслоратидин. Овој антиалергиски препарат е извонредно ефикасен во третман на вообичаените алергии како што е уртикаријата или алергиски ринитис, но делува и во смирување на тегобите кои се јавуваат при прекумерно излагање на сонцето. Оваа група на лекови наречени антихистаминици може да се користи и при алергиски реакции на убоди на комарци, пајаци, пчели и оси. Употребата на други медикаменти или парентерална апликација (мускулна или венска) треба да се под дијагностика и надзор на педијатар.
Антибиотици
Тие се скоро редовен член на патната аптека, но прво правило кое треба да се има предвид е дека антибиотиците не треба да се даваат во кое било време или за што било. Во патната аптека е добро да се има антибиотик со широк спектар особено ако се патува во странство или на егзотични места далеку од урбани центри. Потребата за давање на антибиотик е најдобро да се процени во консултација со педијатар.
Добар дел од аптеката се и антибиотски креми или масти како што се хлорамфеникол, гентамицин или други, со оглед дека не ретко кај децата на одмор се јавуваат и кожни инфекции за кои овие креми или масти се добри за третман. Така на пример, импетигото која е гнојна кожна инфекција е најчеста во лето, како што се и локалните урогенитални инфекции доста почести во лето.
Лекови односно течности за превенција и третман на губиток на течности
Повраќањето и проливите се, веројатно, најнезгодните и најнепријатните состојби кои може да се јават кај едно дете во тек на одморот. Во основа тоа се најчесто летни инфекции на дигестивните органи, но не така ретки се и акутните труења или интоксикации. Притоа без оглед на основниот причинител еден од столбовите на лекување е надополнување на изгубената течност и електролити кај овие деца, а најприроден начин за превенција и третман на рехидратацијата е внес на истите преку уста. Во состојба на лесни проливи и повраќање важно е бргу да се започне со оралните рехидратациони течности, но сепак крајно во состојби на поизразени симптоми потребна е консултација со педијатар за евентуално спроведување на парентерална (венска рехидратација). Оралните рехидратациони средства се базирани на комбинација на гликоза и електролити (на пример, Оросал 65) во оптимален сооднос, а ефектот се базира на активен транспорт на гликоза и натриум во тенкото црево. Овој тип на третман на рехидратација, но и превенција на истата е значаен затоа што е природен пат за надополнување на течности, едноставен е, не е скап, а можеда се изведува и во услови на нормално сместување на одморот. Оралната рехидратација се користи по принцип на мали количества на релативно кратко време, односно на секои 5-10 минути.
Пробиотици
Пробиотиците се т.н. „добри бактерии“ во цревото го помагаат варењето на храна и формирањето на нормална столица. Целиот збир на микророганизми во и нанашето тело како што се бактерии, фунги, вируси се нарекуваат „микробиот на една индивидуа.“ Колку е нормалниот микробиот значаен за животот на секое дете или возрасен човек укажува фактот дека ние имаме во и на себе 10 пати повеќе микророганизми отколку што имаме клетки со кои живееме. Тој баланс лесно може да се наруши при патување на одмор, а како една од најпознатите состојби при промена на биофлората е појаватана т.н. патувачка дијареа. Затоа е неопходна заштита особено на децата, а класичен прототип на пробиотик кој има максимално ефикасен заштитен и терапевтски ефект е Lactobacillus reuteri protectis DSM 17938 (Biogaia во форма на капки или таблети). Тој пробиотик ја затегнува цревната мукоза, го нормализира микробиотот во цревото и го унапредува имунолошкиот одговор кај детето. Со излачување на лактичната, ацетичната киселина и реутериот го промовираат растот на другите лактобацилуси, а ги уништуваат патогените бактерии. Затоа се препорачува да се користат пред одење на одмор, за цело време на траење на одморот но и по враќање од истиот во протективна смисла.
Гел за обработка на рани, стерилна газа и фластери
При одење на одмор обавезно е да се понесат антисептични раствори како што е октанисепт, провидон-јод кои се неопходни за правилна обработка и третман на исеченици или површно повредена кожа. Со стерилната газа и овие средства може да се обработи помала рана или повреда, или барем привремено да се санира до одење на лекар.
Препарати против инсекти
Репеленти препарати за смирување на болката при каснување од инсект треба да се дел од летната аптека. Репелентите се во основа истерувачи на инсекти, а со нивно нанесување на кожата тие ги одбиваат инсектите со својот мирис. Постојат и разни гелови кои ја ладат кожата по убод на инсект. Но ако детето има и пропратна алергиска реакција треба да се дадат лекови од групата на антиалергични лекови.
Заштита на кожата
Новите сознанија за штетното дејство на УВ зрачењето врз кожата се во директна колизија со потребата од сонцето за создавање на витамин Д во истата. Затоа потребно е излегување на сонце, но и да се спроведат одредени мерки на претпазливост за избегнување на изгорениците и воопшто штетното дејство на УВ зраците врз кожата. Првото правило е дека не смеете вашето дете да го „пржите на плажа.“ Не треба да се користат масла за потемнување, затоа што тие само го засилуваат ефектот на УВ зраците и ги влошуваат изгорениците.
Најдобро е да се користат специјализирани креми со иновативна спектрална технологија која комбинира УВА/УВБ филтри од широк спектар со која се обезедува сигурна УВ заштита комбинирани со Ликокалкон А како антиоксидант за заштита од видливата светлина со висока енергија. Добро е овие препарати да содржат и глициретинска киселина која дава дополнителна заштита на ДНК на човекот. Но, најзначајно е да се направи дистинкција на препаратите за заштита од УВ зрачењето кои се користат кај децата во однос на оние за возрасните.
Ако сепак по излегување на сонце се појават иритации, дури и изгореници на кожата користењето на масти од рибино масло кое е богато со витамин А помага и го олеснува и забрзува процесот на регенерацијата на иритирната кожа и онаа која е оштетена од влијанието на УВ зрачење или на хемиските агенси. Таа дава глаткост и сјај на кожата и ја зголемува нејзината еластичност, а ја подобрува и епителизацијата на кожата.
Крајно гледано, во листата на вашата аптека за одмор може да се најдат уште многу лекови или помошни лековити средства, но нивната листа многу зависи од контрибуирачките болести кај вашето дете, неговите навики и општата здравствена состојба. Таа листа сепак треба да е индивидуална и во договор со матичниот педијатар.
