Уште во породилиштата е забележано дека некои новородени деца плачат повеќе од други (ПЛАЧЛИВО БЕБЕ). Овие разлики се потенцираат во текот на првиот месец, односно во текот на совладувањето на цицањето и усвојувањето на ритамот на спиење и будност. Има новородени деца кои плачат и кога им се задоволени сите нивни потреби. Оваа појава се вика иритабилност. Ако детето плаче пред да цица, треба прво да се смири, а потоа да се нахрани.
Пишува: Д-р сци. Александар Сајковски, педијатар
Кога станува збор за сонот, новородените деца во просек го преспиваат поголемиот дел од денот, со чести прекини. Карактеристично е дека новороденото бебе многу брзо заспива при крајот на доењето или набргу потоа, па се препорачува бебето да се преповива пред доењето или на средина од доењето за да се расони, подждригне и добро да се нацица. Она што често ги плаши родителите е појавата на гримаси, забрзано дишење, промена на боја на лицето, движење на очните јаболка за време на спиењето (НЕМИРЕН СОН). Сето тоа не треба да ги плаши родителите, бидејќи тоа е т.н. РЕМ фаза на спиењето, која во овој период е карактеристична за бебешкиот сон.
За повеќето родители појавата на плачливост или немирен сон може да биде доста непријатна и загрижувачка, пa сами си поставуваат дијагноза, а тоа е дека нивното дете има грчеви. Но, дали ги има навистина? Имено, сосема е нормално новороденото дете и доенчето да плачат, а клучното прашање е колку плачење е нормално?
-
Новороденче плаче од 1,5 до 2 часа на ден. Плачот е распореден преку ден, се интензивира попладне.
-
Доенче до 6-та недела може да плаче до 3 часа на ден.
-
После тоа плачот се намалува при што после 6-тиот месец може да плаче приближно 1 час на ден.
Доенче со грчеви или темпераментно доенче плаче повеќе време. Колку ќе плаче зависи од неговиот темперамент што претставува вроден облик на однесување или, пак, изразување емоции. Во историјата на педијатријата уште во педесеттите години од минатиот век, доенчињата се делат на неколку групи и тоа на едноставно, пребирливо и воздржано доенче. Иако едно доенче може да ги има карактеристиките на повеќе од една група, сепак, најчести се карактеристиките на една група. Темпераментните доенчиња плачат повеќе од нормално, тие се раздразливи и немаат редовен период на спиење и хранење. Овие бебиња повеќе се плашат од непознати особи, а може да се вознемируваат при силни звуци. Иако плачат повеќе од обично, сепак, не плачат толку како доенчињата со грчеви.
Грчевите се јавуваат околу втората недела на животот, а ги снемува помеѓу третиот и четвртиот месец
Кај доенчињата со стомачни грчеви нема основен дијагностички метод, иако најчесто се користи т.н. Wesselin правилото, познато и како правило три (плачење 3 часа на ден, 3 дена во неделата, 3 недели по ред).
Доенчето е здраво, напредува и плаче, најчесто касно попладне или рано навечер. Грчевите се јавуваат околу втората недела од животот, а ги снемува помеѓу третиот и четвртиот месец. Меѓутоа, плачот кај пребирливите доенчиња започнува по раѓање, а таквото темпераментно однесување трае цел живот.
Главна разлика помеѓу доенчиња кои имаат грчеви и темпераменти доенчиња е тоа што доенчињата со грчеви немаат други карактеристики во однесувањето како темпераментните доенчиња. Не се хиперактивни, а имаат и воспоставено редовен период за храна и спиење. За разлика од темпераментните доенчиња, доенчињата со грчеви почнуваат да плачат без видлива причина и многу е тешко да се смират. За време на плачот, доенчињата со грчеви ги стискаат рачињата и ноџињата, и го свиткуваат грбот. Се зацрвенуваат во лицето и прават најразлични гримаси, имаат надуен стомак. Такво доенче е многу тешко да се смири. Хранење, лулање и носење во раце не помага.
Клучен елемент во целата состојба е на родителите да им биде објаснето дека без оглед дали се работи за бебе со стомачни грчеви, или немирен сон или темпераментно доенче, ова е само состојба, а не болест.
Препораките за смирување на стомачните грчеви беа дадени во првиот дел од овој текст. Имено веќе се опишани техниките на доење, а ако е детето е на вештачка исхрана користење на АС (антиколик) млеко, употреба на пробиотик, масажа на стомакот на бебето, положба на стомак, исхрана на мајката… Во овој контекст е важно да се напомене дека употребата на лекови како што се спазмолитици, антихистаминици и други препарати не се препорачуваат од страна на педијатрите, а користењето на разни хербални препарати или капки треба да биде во консултација со педијатар.
- Она што често ги плаши родителите е појавата на гримаси, забрзано дишење, промена на боја на лицето, движење на очните јаболка за време на спиењето
Важно е да се напомене дека сите мерки кои се преземаат за смирување на стомачните грчеви кај темпераментните доенчиња нема да делуваат и поради тоа не треба да се испробувааат повеќе различни методи во краток временски период.
Секое дете е посебно и единствено и не може да се споредува со другите.
