Како главна причина експертите го наведуваат податокот дека доматот и краставицата не треба да се јадат заедно, пред се, поради различното време за варење на овие два зеленчука. Доматот за разлика од краставицата, поради високиот процент на растителни влакна што ги содржи, побавно се вари во организмот. Меѓутоа, утврдено е дека постојат комбинации и на други видови зеленчук што се варат со различна брзина, а не влијаат на целокупната дигестија во телото. Различното време на преработка на доматот и на краставицата, појаснуваат други нутриционисти, не е причина да се откажете од совршената комбинација на овие два зеленчука.
Друга причина за можно избегнување на оваа комбинација, според едните стручњаци, е податокот дека краставиците содржат ензими кои го уништуваат витаминот Ц од доматите. Но, од друга страна, тие додаваат дека ова не би требало да претставува проблем, освен за лицата кои имаат проблем со авитаминоза.
И за ова, велат стручњаците, има решение. Доколку ви недостасува витамин Ц во организмот, проблемот може да се реши така што доматите и краставиците ќе ги консумирате одвоено или после оброкот испијте чаша сок од цеден портокал и така ќе ја надоместите потребната доза на витамин Ц. Ако имате чувствителен стомак, следете како вашиот организам реагира откако ќе изедете, на пример, шопска салата. Доколку немате никакви тегоби во стомакот, слободно уживајте во вашата омилена комбинација – домат и краставица.
