Нов вирус сличен на SARS-CoV-2 со потенцијал да премине на луѓе и добиток е идентификуван кај лилјаци на југот на Кинна, покажало ново научно истражување. Кинеските и австралиските научници земале примероци од 149 лилјаци низ провинцијата Јунан, која граничи со Лаос и Мјанмар и идентификувале пет вируси кои најверојатно се патогени за луѓето или добитокот.
Меѓу нив бил и коронавирус на лилјаците тесно поврзан со вирусите SARS-CoV-2 и SARS.
Тоа значи дека вируси слични на SARS-CoV-2 сè уште циркулираат меѓу кинеските лилјаци и продолжуваат да претставуваат ризик од појава меѓу луѓето, вели професорот Еди Холмс, еволутивен биолог и вирусолог на Универзитетот во Сиднеј и коавтор на истражувањето.
Истражувањето покажало и дека лилјаците биле редовно заразени со неколку вируси истовремено, што е значајно бидејќи покажува потенцијал постоечките вируси да заменат делови од својот генетски код, во процес познат како рекомбинација, за да создадат нови патогени.
Главната порака е дека одредени лилјаци може да содржат многу различни типови на вируси и дека понекогаш истовремено им се и домаќини. Ваквите истовремени инфекции, особено со сродни вируси како што е коронавирусот, му даваат шанса на вирусот да ги замени критичните делови од генетските информации, природно создавајќи нови варијанти, објаснува проф. Џонатан Бол, виролог од Универзитетот Нотингем кој не бил вклучен во истражувањето.
- Нова закана?
Оваа студија ни дава многу важен преглед на еволуцијата и екологијата на коронавирусот, можностите за нивна рекомбинација и редовното прескокнување во нови видови. Тоа покажува јасна и присутна закана од ново прелевање кај луѓето, вели професорот Стјуарт Нил, шеф за заразни болести на Кралскиот колеџ во Лондон.
Претходно, научна анализа проценила дека дури 400.000 луѓе се инфицираат со вируси што ги пренесуваат лилјаците низ јужна Кина и Југоисточна Азија секоја година.
Од петте вируси означени како загрижувачки, еден познат како BtSY2 имал карактеристики на вирусот САРС, кој уби 774 луѓе и зарази 8.000 во епидемијата во 2003 година и вирусот SARS-CoV-2, кој ја предизвикува болеста КОВИД-19.
Важно е да се напомене дека BtSY2 имал домен за врзување на рецепторите многу сличен на оној на вирусот SARS-CoV-2. Станува збор за шилестиот протеин кој вирусот го користи за да се прикачи на човечките клетки и на кој целат повеќето вакцини против КОВИД-19. Тоа сугерира дека BtSY2 исто така може да зарази луѓе.
