Ако имате проблеми со дигестивни тегоби, веројатно, ќе посегнете по чаша газирана вода.
Минералната вода, во комбинација со меурчињата CO2, се покажала како ефикасна во стимулација на дигестивниот систем. Авторите на студијата објавена во „European Journal of Gastroenterology and Hepatology“, презентирале податоци кои покажуваат дека газираната минерална вода може да ги ублажи симптомите на лошо варење и опстипација (запек).
Но, експертите предупредуваат дека постојат добри причини против честото консумирање газирана вода. Водата со меурчиња CO2, односно карбонизираната вода може да предизвика расипување на забите и зголемување на телесната тежина, пишува „Њујорк пост“.
Меурчињата на јаглерод диоксид во вода предизвикуваат слаба карбонатна киселина. Стоматологот од Лондон, Адам Торн, тврди дека таа може да ги оштети забите.
„Меурчињата може да предизвикаат ерозија на забната глеѓ, која со тек на време може да доведе до болни, жолти заби“
Од друга страна, американскиот експерт и портпарол на Американското Здружение на стоматолозите, Едмонд Р. Хјулит, не се согласува со ова тврдење.
„Аромата, а не карбонизацијата ја намалува pH вредноста до штетно ниво, кое може да предизвика проблеми со забите поради честа консумација“, изјавил Хјулит.
Сепак, тој признал дека е неопходно да се спроведат дополнителни истражувања за да се утврди дали газираната, неароматизирана вода има штетно влијание врз оралното здравје.
Претходните истражувања покажале дека газираната вода може да предизвика зголемување на телесната тежина, иако содржи малку калории.
Тоа е објаснето со фактот дека меурчињата на јаглерод диоксид може да предизвикаат посилно чувство на глад, кое не би го имале доколку би пиеле „обична“ вода.
