Неодамна е направено истражување кое требало да испита како пиењето кафе (во споредба со пиењето исто количество вода) влијае на човековата ДНК. Во истражувањето учествувале 50 жени и 50 мажи со добро здравје. Во првите четири недели сите испитаници пиеле барем по 500 мл вода и воопшто не пиеле кафе, чај, ниту какви било напитоци со кофеин. Во текот на следните четири недели една група секојдневно пиела по 500 мл кафе направено од темно печени зрна, додека другата група продолжила да пие вода (како и во првите четири недели). На крајот од четвртата и осмата недела направени се крвни анализи на учесниците во истражувањето за да се процени нивото на оштетување на ДНК.
Се покажало дека кај учесниците од групата која пиела кафе степенот на оштетување на ДНК се намалил во споредба со контролната група. Врз основа на овие резултати, авторите на студијата заклучиле дека редовното консумирање кафе од темно печени зрна има заштитен ефект врз ДНК. Овие поволни ефекти биле слични и кај мажите и кај жените, а, исто така, е забележано дека во периодот од 8 недели колку што траело истражувањето кај учесниците не дошло до битни промени на телесната тежина, ниту на дневниот калориски внес.
