Бројни научни истражувања потврдиле дека умерената физичка активност поволно влијае на здравјето така што го намалува ризикот од кардиоваскуларни заболувања, дијабетес и некои форми на карцином, го подобрува расположението и ни помага подолго да живееме и тоа во добра форма.
Меѓутоа една неодамнешна студија покажала дека непосредно после напорен тренинг, особено после вежби на издржливост, имуниот систем е привремено ослабен, а тоа телото го прави подложно на болести.
Имено, долготрајните тренинзи со ретки паузи претставуваат физиолошки стрес кој може да се поврзе со зголемен ризик од инфекции и намалување на ефикасноста на имунитетот.
Интензивната физичка активност влијае на бројот на леукоцити
Неодамнешното истражување покажало дека интензивната физичка активност предизвикува привремено слабеење на функциите на имуниот систем за време на опоравувањето после вежбањето. Во истражувањето е утврдено дека вежбањето го зголемува, односно намалува бројот на одредени типови леукоцити – се зголемува нивото на неутрофили и моноцити кои циркулираат, но истовремено се намалува нивото на лимфоцити за време на периодот на опоравување.
Авторите на студијата напоменуваат дека после вежбање често доаѓа до намалување на бројот на клетки убијци (посебен тип на лимфоцити чија главна улога е да го одбранат организмот од вируси и клетки на тумор), но дека тоа не значи оти овие клетки биваат уништени, туку дека привремено одат во други делови од телото. Интензивна физичка активност како облик на физиолошки стрес доведува до физиолошки и биохемиски промени во телото, па авторите веруваат дека клетките на имуниот систем едноставно преминуваат од крвотокот, во, на пример, белите дробови или гастроинтестиналниот тракт.
Како побрзо да се опоравите после напорен тренинг!?
Непосредно после интензивен тренинг телото е поподложно на инфекции. Колку физичката активност е понапорна, толку на имуниот систем му е потребно повеќе време за да се опорави и врати во вообичаениот режим. Научниците сметаат дека најефикасен начин за превенција од овие негативни промени на имуниот систем е консумирање јаглехидрати.
Истражувањата покажуваат дека консумирањето јаглехидрати за време или непосредно после вежбање го намалува ослабувањето на функциите на имуниот систем како резултат на големиот физички напор и му помага на телото да се опорави. Ова особено им помага на луѓето кои се бават со физички активности со висок интензитет во траење од 90 минути и повеќе. Меѓу 30 и 60 г јаглехидрати на секој час за време на вежбањето помагаат во одржувањето на нормалните функции на имуниот систем.
