Необјаснивите случаи на тежок хепатитис кои се пријавени кај речиси 400 деца во светот, може да бидат последица на низа проемни во организмот поттикнати од непрепознаена инфекција со коронавирусот SARS-CoV2, велат научниците.
Кај децата заболени од КОВИД-19 воочен е значајно поголем ризик од дисфункција на црниот дроб по одредено време, покажуваат резултатите од студија објавени на интернет страницата medRxiv која се уште не поминала стручна рецензија.
Забележано е дека родителите на поголемиот број деца со акутен хепатитис, ретка болест во таа возрасна група, не пријавиле претходно прележана инфекција со SARS-CoV-2.
Утврдено е дека повеќето заболени биле заразени со аденовирусот 41Ф, а во медицината не е познато дека тој вирус го напаѓа црниот дроб.
Можно е заболените деца, а повеќето не се вакцинирани поради возраста, да имале благи или асимптоматски инфекции на КОВИД-19 кои поминале незабележано, претпоставуваат научниците кои своите забелешки ги објавиле во списанието The Lancet Gastroenterology & Hepatology.
Ако нивната претпоставка е точна, остатоците од коронавирусот што се задржуваат во гастроинтестиналниот тракт на децата може да го поттикнат имуниот систем на претерана реакција на аденовирусот 41Ф, па големата количина на воспалителни протеини на крајот би можела да го оштети црниот дроб.
“Препорачуваме кај децата со акутен хепатитис да се испита присутноста на SARS-CoV-2 во столицата и да се обрне внимание на останатите сигнали кои упатуваат на оштетувања на црниот дроб бидејќи шилестиот протеин на коронавирус е ‘суперантиген’ што го прави имуниот систем премногу чувствителен“, велат тие.
Минатиот вторник Светската здравствена организација потврди дека досега во светот меѓу децата се идентификувани 348 случаи на хепатитис од непознато потекло и дека научниците ја истражуваат можната поврзаност на аденовирусот со заразата со КОВИД-19.
