![Washing hands](https://panacea.mk/wp-content/uploads/2019/07/zp-pranje-Depositphotos_28423197_m-2015-696x464.jpg)
„Дали ќе се заразам со бактериите од оние кои пред мене се измиле со овој сапун?“ – ова прашање сигурно ви поминало низ глава во некој јавен тоалет или слична просторија која не е ваша. Експертите тврдат дека не треба многу да се грижиме за ова и слободно да се измиеме. Еве зошто:
Во студијата направена во далечната 1965 година, научниците спровеле низа експерименти во кои намерно ги заразиле своите раце со повеќе од пет милиони бактерии – сите сериозни бактерии, како на пример, ешерихија коли. Потоа научниците ги измиле рацете со сапун, а истиот тој сапун (станува збор за тврд сапун) го дале на друга личност за и таа да го стори истото. Било откриено дека на тој начин бактериите не се пренеле од едната на другата личност.
„Нивото на бактерии кои можат да се појават врз сапунот, дури и во екстремни услови на користење, не претставува опасност по здравјето“, тврдат авторите на оваа стара студија.
Податоците биле потврдени и со следното истражување направено во 1988 година нарачано од страна на производители на сапуни. Во рамките на истражувањето парчиња сапун биле „заразени“ со патогени бактерии, па учесниците се измиле со нив. Кај ниту еден од испитаниците не биле детектирани бактерии на рацете, па донесен е заклучок дека постои „само мал ризик во рутинското миење на раце со претходно користен сапун“, односно ниедна стдија не покажала дека заразен сапун може да биде извор на инфекција.
![](https://panacea.mk/wp-content/uploads/2019/07/sapun.jpg)
Оттука сосема логично се поставува прашањето – течен или цврст сапун?
Центрите за контрола и превенција од болести сметаат дека миењето раце е првата и најважната линија на одбраната од инфекции, па го поддржуваат и течниот сапун и оној тврдиот. Единствената грешка која можете да ја направите е од страв за да не се заразите (кој е неоснован) да не ги измиете своите раце.
И уште еднаш – сапунот не е плодна подлога за размножување на бактериите кои ги оставаат оние што го користат. Иако некое време бактериите се задржуваат на сапунот, не живеат долго. Значи, цврстиот сапун апсолутно не е нехигиенски како што се мислело. Што се однесува до течниот сапун, бактериите не се собираат на самиот сапун, туку на пумпичката. Затоа мијте ги убаво рацете.
И течниот и цврстиот сапун може да се користат без никаков страв, важно е само да се користи сапун!