Намалувањето на порциите на прехранбените производи би можело да придонесе за намалување на дебелината преку промена на перцепцијата за „нормална“ големина на порцијата, која инаку со текот на годините се повеќе и повеќе се зголемува, е заклучокот на трудот на тим психолози, објавен во „The American Journal of Clinical Nutrition“.
Во истражувањето испитаниците поминале низ три последователни експерименти. Во рамките на првиот по случаен избор биле подредени во две групи, каде што првата група добивала поголеми, а втората група помали порции од истото јадење. Во вториот експеримент, кој следувал еден ден по првиот, им се советувало на учесниците да се послужат со количина од вчерашното јадење која ја сметале за најсоодветна. Во третиот експеримент, кој следувал после една недела, од испитаниците се барало да ја одберат преферираната големина на порција.
Резултатите од сите три експерименти потврдиле дека ако испитаникот бил послужен со помала порција на храна, тој самиот „нормалната“ големина на порција ја перципирал помала поради што постои тенденција за консумирање на помали количини на храна.
Затоа научниците апелираат на намалување на порциите на прехранбените производи, како едно од можните решенија за глобалната епидемија на дебелина.
