Дали се втемелни предупредувањата како ова: “Затвори прозор! Провев е и сите ќе настинеме!“. Лекарите велат дека не се разболуваме поради провев или народски кажано промаја, туку поради вируси. Но, додаваат дека изложеноста на провев влијае на нашиот организам така што на нашата кожа и под неа се одвиваат процеси кои може да резултираат со течење на нос или вкочанет врат.
Провевот е поврзан со т.н. индекс на ладење, односно субјективно чувство на ветровито време на кожата. Колку е поголема брзината на ветарот, толку чувството на температура е пониско, односно разладување е побрзо.
“Кога температурата е мису 5 Целзиусови, а вие сте некаде надвор и не дува ветар, вашето тело загрева тенок слој на воздух близу кожата“, појаснува германскиот оториноларинголог Томас Дејтмер, генерален секретар на Здружението за оториноларингологија на Германија.
КАКО ВОДЕН КОСТУМ ВО СТУДЕНА ВОДА
Тој тенок слој на воздух ве изолира од ладно. Но, студениот ветар што дува по вашето тело ја растерува таа топлина. Колку посилно дува, телото побрзо ја губи топлината и почнувате да чувствувате дека ви студи.
Тој ефект се засилува ако кожата ви е мокра, на пример од пот, бидејќи воздухот што струи влијае на побрзо испарување на влагата и на тој начин побрзо ја “однесува“ топлината од телото отколку воздухот што мирува.
Кога површината на вашето тело се лади во студениот воздух, кој го чувствуваме како провев, крвните садови се стеснуваат, намалувајќи го протокот на крв за да се намали загубата на топлина од топлата крв.
“Тоа може да влијае и на слузницата на носот и грлото. Провевот делува така што ги суши, ја ослабува нивната имунолошка одбрана и ве прави поподложни на вирусите на настинка“, објаснува д-р Дејтмер.
Но, ако сте здрави, нема да се разболите само затоа што сте биле изложени на провев.
Д-р Мајкл Диг, член на Германското здружение на оториноларинголози, споменува уште една можна последица од провевот: вкочанет врат, особено при топло време.
“Ако ви е жешко и седите пред вентилатор или многу блиску до клима уред или отворате прозорец додека патувате со автомобил, воздухот што дува низ вашата топла и често испотена кожа може во некои случаи да резултира со напнатост во пределот на вратот“, тврди д-р Диг.
Тој додава дека телото со својата температура секогаш настојува да се прилагоди на околните услови.
“На површината на нашата кожа има рецептори кои ја мерат температурата на кожата. Проблемот со благиот провев е што температурната разлика е многу мала, па терморецепторите не успеваат да ја детектираат“, објаснува Диг.
Така, кожата се лади, но телото не реагира доволно брзо, што може да влијае на стеснување на крвните садови во пределот на вратот и последователно да доведе до напнатост кои се наоѓаат под нив.
