Во Велика Британија владее епидемија на стрес, тврди нутриционистката Шарлот Вотс, осврнувајќи се на седум физички показатели кои укажуваат на тоа дека едно лице е под притисок. Вотс вели дека организмот кој е под притисок побрзо апсорбира хранливи материи, што значи дека работи побрзо, но помалку ефикасно.
Симптомите кои се јавуваат најчесто се поврзуваат со недостаток на витамини и минерали, што предизвикува крвавење на непцата и бели дамки на ноктите.
Нутриционистката вели дека секој симптом укажува на недостаток на одреден витамин или минерал: испукани усни – витамин Б6, бруксизам или чкрипење со забите – витамин Б5, бели дамки на ноктите – цинк, запек или дијареа – магнезиум, тврди мозолчиња на рацете и бутовите – витамин Е, чести инфекции на грлото и градниот кош – витамин А.
Направени се и голем број на студии кои покажуваат дека стресот влијае и на промена во телесната тежина. Истражувањето спроведено на Универзитетот Калифорнија во Сан Франциско покажало дека жените кои поминале низ стресен настан се повеќе склони кон дебелеење од оние кои живеат мирен начин на живот.
И додека повеќето научници тврдат дека стресот има само негативна страна, група на научници од Универзитетот Нортвестерн во Илиноис велат дека мала количина на стрес може да биде од корист за здравјето на клетките.
Истражувањето чии резултати беа објавени во магазинот „Cell Reports“ укажуваат на тоа дека кортизолот, често нарекуван „хормон на стресот“, може да ги заштити клетките кои стареат и да го намали ризикот од развој на дегенеративни болести како што се Алцхајмеровата болест и Хантингоновата болест.
