Неретко се случува нашите гости да се слекуваат во ходникот или пред вратата, но има и такви кои сметаат дека тоа е некултурно. Како и да е, оваа ситуација може да биде мошне непријатна и за гостинот и за домаќинот, па заради тоа ќе се обидеме да ја решиме вечната дилема – слекување на обувките или не?
Традицијата на слекување пред вратата влече потекло од источните земји каде апсолутно е незамисливо во куќата да се влезе со чевли на нозете. Тоа се однесува и на сопствената, но и на туѓата куќа. Источните народи веруваат дека ако гостите не се слекуваат пред вратата зад себе оставаат негативна енергија. Да се биде облечен во куќата во Јапонија значи непочитување на домаќините, а овој обичај се почитува и во некои скандинавски земји, во Турција, Лондон, Берлин, Рим… Кај нас овој обичај дошол од Турција каде е потполно вообичаено низ дома да одите боси затоа што на подовите се седи, јаде и пие.
Сепак ако сте во Париз, Лондон или Рим подобро е да не се слекувате пред вратата на домаќините затоа што тој гест се смета за недоличен и секогаш имајте на ум дека таму е мошне важно какви обувки носите затоа што домаќинот убаво ќе ве „измерка“. Затоа ако планирате да одите во посета кај некој кој живее во овие градови облечете ги своите најубави обувки и заборавете на слекувањето.
Мислењето дека не треба да се слекува пред вратата на домаќините води потекло од времето кога гостите се пречекувале во салони и простории кои биле наменети исклучиво за тоа. Таквите простории обично не биле опремени со теписи и биле наменети за собирање голем број гости, но блиските личности кои биле пречекувани во „интимните“ делови од домот сепак морале да се слекуваат.
Ако се гледа од хигиенска гледна точка, слекувањето е неопходно, без оглед за чија куќа се работи – туѓа или својата. Домаќините најчесто имаат наменски влечки за гостите, па облечете ги ако ви е неопходно да имате нешто на нозете, но како што не ја валкате сопствената куќа не би требало тоа да го правите ниту во туѓа.
Едно американско истражување покажало дека со носење чевли во домот внесувате многу повеќе валканици и бактерии опасни за здравјето отколку што мислите.
Студија направена на Универзитетот во Аризона нашла дури 421 000 разни бактерии на чевлите. Колиформната бактерија која служи како индикатор на нивоата на чистота на храната и водата (присутна е во изметот) е пронајдена на ѓонот на 96 проценти од чевлите.
Бактеријата Escherichia coli е пронајдена на 27 проценти од чевлите заедно со уште седум видови бактерии, вклучително и Klebsiella pneumoniae, која може да предизвика инфекција на уринарните патишта и Serratia ficaria која може да предизвика инфекција на дишните патишта.
Кога станува збор за пренесувањето бактерии од чевлите на подовите во топлиот дом, истражувањето покажало дека со одењето во чевли можете да пренесете од 90 до 99 проценти бактерии. Студија направена на Универзитетот во Хјустон дошла до заклучок дека на 39 проценти од чевлите се наоѓа бактеријата Clostridium difficile, отпорна на бројни антибиотици, а може да предизвика разни проблеми со здравјето вклучително и дијареа.
Сите овие податоци одат во прилог на заклучокот дека штом влезете дома би требало да ги соблечете чевлите, а како што внимавате на својот би требало да внимавате и на домот на оној кој ве прима на гости. Кога ќе се постави прашањето за бонтонот, без сомнеж, слекувањето не е по правилата на културата, но сепак можеби е многу подобро да се заобиколи едно правило на убаво однесување и да се мисли на здравјето!
