Физичките симптоми на мумурлук се препознатливи: главоболка, мачнини и вртоглавица. Но, анксиозност и други пореметувања на расположението (како и засилена иритабилност или нерасположеност и тага) исто така се чести следбеници на алкохолот.
Не е невообичаено да ден откако малку ќе се претера со алкохол, лицето да се чувствува полошо од вообичаено, а понекогаш тоа е проследено и со чувство на нерасположение, тага и безнадежност. Станува збор за посталкохолна депресија. Кај некои лица, овие промени на расположението по консумирањето алкохол може да бидат прилично интензивни до таа мера да предизвикаат и паничен напад, проследен со отежнато дишење и вознемиреност.
Зошто ова се случува?
Кога телото го метаболира алкохолот за да го исфрли од “системот“, се случуваат две работи: нивото на шеќерот во крвта паѓа, а воспалителните процеси се интензивираат.
Бројни студии докажале дека овие воспаленија доведуваат до промена на расположението и проблеми со помнењето, бидејќи скокот на инфламаторните маркери може да влијае и на нервниот систем. Кога на тоа ќе се додаде и ниското ниво на шеќер во крвта, се јавува нервоза и потиштеност, во зависност од типот на личноста.
