Најновата шведска студија сугерира дека мажите кои се подложуваат на третмани за лекување стерилитет се во многу поголем ризик во средни години да им се јави рак на простата. До овој заклучок дошле со анализа на податоци собрани во шведскиот национален регистар меѓу 1994 и 2014 година. Милиони деца кои се родени во тој временски период се од татковци во триесеттите години. Повеќето (97%) добиле деца по природен пат, а 1,7 отсто од татковците (околу 20 600 мажи) се подложени на ин витро оплодување, додека уште 1,3 отсто (речиси 15 000 мажи) добиле потомство со интрацитоплазматска техника на вбризгување сперма (ICSI).
Со споредба на податоци откриено е дека само 0,28 % од мажите кои добиле деца по природен пат добиле рак на простата, таа бројка е нешто повисока кај оние кои се подложиле на ин витро оплодување 0,37 %, додека најмногу заболени – дури 0,42 % се од групата кои се оствариле како родители со вбризгување на сперма. Научниот тим нагласил дека вбризгувањето на сперма обично е резервирано за мажите кои се борат со најсериозните видови на стерилитет.
До ова откритие се дошло земајќи предвид низа други фактори, вклучително и возраст, образование, како и дали кај пациентите постои историја на оваа болест.
„Мажите кои станале татковци благодарение на третманите за потпомогната репродукција, особено по пат на ICSI, се изложени на висок ризик од појава на рак на простата“, истакнал тимот на шведски научници кој истакнува дека засега не постојат докази дека неплодноста всушност предизвикува рак на простата.
Резултатите од оваа студија покажале дека карциномот на простата и различните видови неплодности се поврзани со нивото на тестостерон во телото на мажот. Исто така, можно е кај двете заболувања да постои абнормалност на машкиот „Y“ хромозом.
